Ekonomiya Mas Mo Kusog?

Ni Alex Mapoy

BUTUAN CITY – Gilauman nga mas makapakusog sa ekonomiya ang implementasyon sa onse bilyones nga kantidad sa Philippine Rural Development Project (PRDP) Infra-Sub-Projects human kini hingpit nga na aprubahan subay sa kompermasyon sa National Project Coordination Office (NPCO).

Gihimo ang pagkomperma sa NPCO atol sa gipahigayon nga PRDP I-BUILD Component 7th Assessment and Coordination Meeting sa nakalabay nga semana.

Sumala ni Department of Agriculture (DA) Caraga Information Officer I Fretcher Magatao, gi-aprubahan sa NPCO ang 190 ka mga subprojects nga nagkantidad og P11.3 bilyones.

Basi sa cluster performance, ang Luzon A dunay 22 ka mga subprojects ang na aprubahan nga nagkantidad og P2,099,281,097.39; sa Luzon B, dunay 30 ka mga subprojects nga nagbalor og P2,224,871,089.72; sa Visayas, dunay 25 ka mga subprojects ang na aprubahan nga nagkantidad og P1,932,571,008.94; ug sa Mindanao, dunay 113 ka mga subprojects nga nagkantidad og P5,113,112,803.26.

Sa kinatibuk-an, mokabat sa 190 ka mga subprojects ang na aprubahan diin 69 niini ang padayon pang gi-implementar ug kadaghanan niini anaa sa Mindanao.

Gikabutyag ni PSO Mindanao Deputy Program Director Consolacion Satorre, hapit na nakab-ot sa I-BUILD ang na aprubahang pundo nga mokabat sa kinatibuk-ang P26.7 bilyones nga gitagana sa paggama og mga subprojects.

Katarungan sa opisyal, kadtong mga proposal sa nagkadaiyang Local Government Units (LGUs) ang padayon pang gi-rebyu kon nakasunod ba kini sa gikinahanglang rekisitos adiser aprubahan ang isa ka proyekto.

Aminado si NPCO Alternate I-BUILD Head Engr. Ericson Mammag nga daghang “concerns” ang ilang nabagatan sa field.

Bisan pa man, gipaneguro ni Mammag nga pinaagi sa nasangpit nga kasinatian, mas mapalambo pa ang pagpatuman sa mga mekanismo dungan sa pagpaneguro nga estriktong ipatuman ang saktong proseso aron malikayan ang posibleng pagkalangan sa implementasyon.