Hustisya Inspirasyon sa Manilakbayan

Ni Alex Mapoy

MANILAKBAYAN. Hustisya ug pagpasibaw sa tinuod nga kahimtang sa Mindanao, inspirasyon sa tanang delegasyon. Photo courtesy of Karapatan Caraga

BUTUAN CITY – Inspirasyon sa 60 ka mga delegado sa Manilakbayan nga na gikan sa rehiyon sa Caraga mao ang paghatag sa hinanaling hustisya ngadto sa mga biktimang lumad nga yanong gipatay sa armadong grupo ug pagpasibaw sa tinuod nga kahimtang sa Mindanao.

Ang mga naglangkob sa Manilakbayan ning rehiyon na gikan sa sa sektor sa lumad, mag-uuma, mamumuo, ka estudyantihan sa Alternative Learning Center for Agricultural and Livelihood Development (ALCADEV) ug Tribal Filipino Program of Surigao del Sur (TRIFPSS).

Gipasabot ni Karapatan Caraga Secretary General Eliza Pangilinan, ang Manilakbayan ka tinuig nga kalihokan sa tibuok Mindanao nga gisalmotan sa sa nagpakabanang grupo sa tibuok Mindanao partikular na sa West Mindanao; Caraga; Southern Mindanao Region; Northern Mindanao; ug South Cotabato, Cotabato, Sultan Kudarat, Sarangani and General Santos (SOCCSKSARGEN).

Dugang ni Pangilinan, tinguha usab sa grupo nga gawas sa pagsinggit sa hustisya alang sa mga biktimang lumad, ipasibaw usab nila ang tinuod matod pa nga kahimtang sa Mindanao.

Pamugos sa nauwahi, puntirya matod pa sa estado ang pagbungkag sa mga NPA, apan subo lamang matod pa ang grupo sanglit tungod sa Oplan Bayanihan ni Pangulong Noynoy Aquino, dili tinuod nga rebelde ang gigukod kondi ang komunidad sa mga lumad.

Hag-as lamang matod pang gi-ataki ang mga non-formal schools, pagpakaulaw sa mga nagtudlo lakip na ang mga opisyales, ug nakapait, ngilngig pa nga gipatay ang school director lakip ang pipila ka mga lideres sa lumad kinsa biktima matod pa sa pasangil nga sila mga rebelde.

“Ang pagpangatake sa mga non-formal schools sa mga lumad area, vilification sa mga teachers niini apil sa mga opisyales sa mga  eskwelahan, ang pagpatay sa mismong direktor nga si Emok Samarca, ang pag-atake sa mga komunidad nga ginapatay ang mga lumad lider sa pagpasangil nga  mga NPA sama nila ni Dionel Campos ug Datu Bello Sinzo. Kini nga kahimtang kanunay nasinati dili lang sa Caraga kung dili sa tibuok Mindanao,” pahayag ni Pangilinan.

Subay niini, maisugon ang grupong nagpakabana sa rehiyon lakip na sa nagkadaiyang bahin sa Mindanao ang pagpasibaw sa tinuod nga kahimtan ning isla ngadto sa kaulohan dungan sa panghinaut nga mahatagan sa hinanaling pagtagad ug mahatag ang tinuod nga hustisya ngadto sa mga biktima.