Kalihokan sa Nacoco Week, Kasado Na

Ni Alex Mapoy

Parole and Probation Office II Alex Castaños

BUTUAN CITY – Plastado na ang tanang kalihokan sulod sa isa ka semana nga kalihokan alang sa pagsaulog sa National Correctional Consciousness (NaCoCo) sunod semana.

Ang nahisgotang kalihokan pasiugdahan sa Butuan City Jail uban sa pag-abag sa ubang ahensya sa goberno sama sa Parole and Probation Administration (PPA) Butuan ug Prison Apostolate sa Simbahang Katoliko.

Pipila sa aktibidad nga nakahan-ay mao ang Volleyball Friendship Game, Basketball Friendship Game, Parlor Games, Legal Counselling, Medical and Dental Mission, Information Drive sa Parole  and Probation Office Butuan, Mr. & Miss BCJ, ug Family Day with Live Band.

Sumala ni Parole and Probation Office II Alex Castaños, ang tanang kalihokan nga gi-andam aron mabati sa tanang piniriso nga gihatagan sila og bili sa kagamhanan.

Dugang ni Castaños, bisan sila nahisalaag, gihatagan pa gihapon sila og igong gibug-aton aron magiyahan nga magpuyo sa sakto nga dalan.

Kabahin ang PPA Butuan sa selebrasyon sanglit isa kini sa mga ahensya sa goberno nga niumol sa mga piniriso kinsa temporaryong gawasnon, apan gipailawom sa superbisyon sa naasoy’ng buhatan ubos sa pagpanguna ni Chief Probation and Parole Officer Cristina R. Argente.

Ning tuiga, ang kalihokan gisabak sa tema, “Maayos na Pamamahala ng Piitan, Kaagapay ng Bayan para sa Pagtaguyod at Pagtahak sa Tuwid na Daan.”