Tuesday, April 7, 2015

Timbangan ng Bayan Gitunol

Ni Alex Mapoy
AGUSAN DEL NORTE – Napahimuslan na sa hingpit ang Timbangan ng Bayan nga gitunol sa kadumalahan sa Department of Trade and Industry (DTI) Agusan del Norte ngadto sa napulo ka mga mayor kinsa nagserbisyo ning probensya.

Gihimo ang pagtunol sa timbangan diha sa Big Daddy Hotel and Convention Center diin nilawas kining gitunol sa kadumalahan ni DTI Agusan del Norte Officer-In-Charge – Provincial Director Gay A. Tidalgo.

Nasuta nga sa maong okasyon, 16 ka mga timbangan ang hingpit nga natunol kansang mga yunit ang napahimuslan na sa mga katawhan.

Gawas sa timbangan, duna usab kini housing nga gipataban aron maoy sab-itan sa naasoy’ng pasilidad.

Ang Timbangan ng Bayan usa ka nationwide project nga gipatuman ngadto sa mga sangang buhatan sa kagamhanan.

Katuyuan niini nga maseguro ang paghatag pagpanalipod sa interes sa mga pumapalit diin pinaagi sa maong timbangan, mahatagan og kahigayonan ang mga kustomer sa pagsusi kon husto ba ang timbang sa gipalit niini nga produkto.

Sa maong paagi, maminusan kon ugaling dili hingpit mawagtang ang mga limbongan nga magpapatigayon sa nagkadaiyang merkado publiko

“The project aims to minimize if not eradicate any deceptive or unconscionable sales act related to weighing scales that may be practiced by some unscrupulous businessmen, thus giving consumers the best value for their hard earned money,” mensahe ni Tidalgo.

Sa maong okasyon, natunol ang 16 ka mga timbangan samtang laing 14 ka mga Timbangan ng Bayan ang gitakdang itunol ngadto sa siyudad sa Cabadbaran ingon man sa Butuan.

Pasalig sa opisyal nga itunol ang 2nd batch nga timbangan sa dili pa mahuman ang kasamtangang bulan.

Sa higayong matunol na ang ikaduhang batch sa mga timbangan, mokabat sa 30 ka buok ang kinatibuk-ang ihap ang mahatag sa probensyal nga buhatan. 

Balik-Manggagawa Pabayron

Ni Alex Mapoy
Kenneth Po sa PhilHealth Caraga.
BUTUAN CITY– Angayang bayran una sa Balik-Manggagawa ang premium contributions niini sa Philippine Health Insurance Corporation (PhilHealth) adiser kini mo kuha og Overseas Employment Certificates (OECs) sa Philippine Overseas Employment Administration (POEA).

Awhag kini ni Kenneth Po sa PhilHealth Caraga ngadto sa tanang Balik-Manggagawa subay kini sa mensahe nga gipaabot sa opisyal.

Sumala ni Po, sugod adtong Abril 1 ning tuiga, tanang nibakasyon o kaha subleng na hire pagka- overseas Filipino workers (OFWs) gi-obliga na kini sa pagbayad sa ilang premium contributions ngadto sa pinakaduol nga buhatan sa ahensya.

Ang pagabayran nga premium contributions, wala kini labot, pasabot ni Po, sa pagabayran niini ngadto sa POEA sa pagakuhaon niining OECs.

Dugang ni Po, ang nasangpit nga katikaran sibo kini sa nahimong desisyon sa POEA nga estriktong ipatuman ang “single collection policy” sa maong petsa.

Giklaro sa opisyal, bugtong kolektahon nga bayad sa POEA mao lamang kadtong bayrunon alang sa OEC, ug wala kini labot sa pagkolekta sa balayrunon ngadto sa PhilHealth ug Pag-Ibig Fund.

Nasayran nga ang tinuig nga pagabayran sa Overseas Filipino alang sa premium contribution sa PhilHealth, anaa lamang sa P2,400. Ang nahisgutang kantidad nag-cover na sa tanang “qualified legal dependents” sa migrant worker sama sa legal nga asawa o bana kinsa dili membro sa PhilHealth; legitimate ug illegitimate children nga wala pa niabot sa 21 anyos, wala pa naminyo ug walay trabaho; ginikanan nga wala pa ka abot og 60 anyos, apan nag-antos na sa “permanent disability” nga maoy hinungdan nga kinahanglan nang sustintohan sa kabanay.

Sa mga ginikanan nga nakaabot na og 60 anyos pa taas ug dili pa membro sa PhilHealth mahimo kining magpa-enrol ilawom sa Senior Citizen category.

Pasalig sa PhilHealth nga andam mo bayad ang ahensya sa overseas hospitalization sa migrant workers, ingon man sa pagka-ospital sa ilang legal dependents nga nahibilin dinhe sa nasod pinaagi sa “reimbursement mechanism.”  

Pag-umangkon Nangomedya Gitigbas

Ni Alex Mapoy
Ambago Police Station
BUTUAN CITY – Usa ang patay samtang usa ang nagpaalim sa mga samad nga na angkon human nag-unay ang uyuan ug pag-umangkon diha sa Purok 4, Brgy. Bancasi ning siyudad adtong Lunes, alas-2:30 sa hapon.

Giila sa kapulisan ang namatay nga usa ka Angelito Lor, 59 anyos, usa ka dispatcher samtang ang samaran naila nga usa ka Arcenio Orion Raza, 74 anyos, ulitawo, ug residente sa maong dapit.

Basi sa imbestigasyon nga gihimo sa kapulisan sa Ambago Police Station sa pagpanguna ni Police Inspector Victor P. Butcon, naugkat ang daang bangi sa uyuan ug pag-umangkon tungod lamang sa walay hinungdan nga komedya.

Pinasikad sa imbestigasyon, nagkagod og lubi adtong tungura si Rodrigo Lor sa payag ni Arcenio aron lutuon ang suso gamit ang tuno sa lubi.

Dihang kamulo og kagod si Rodrigo, niabot ang igsuon niini nga si Angelito kinsa pag-umangkon ni Arcenio.

Nangutana si Angelito kang Rodrigo kon unsay gamitan sa gikagod niining lubi ug gitubag usab kini sa igsuon nga iluto sa suso.

Dali usab nga nitubag si Angelito, kansang tubag, gipaagi og komedya nga basin luwaan unya kini sa uyuan niining si Onyong (Arcenio).


Ang maong komedya sa pag-umangkon, wala nalilong ni Arcenio sanglit didto kini sulod sa kaugalingong payag ug nadungog ang tanang gisulti ni Angelito.

Gigawas kini ni Arcenio ug didto nahitabo ang pagtinubagay sa duha tali sa uyuan ug pag-umangkon.

“Initial investigation conducted revealed that at about 2:30 in the afternoon of same date one Rodrigo Lor y Raza brother of Angelito and nephew of Arcenio, averred that at that time, he was grating a coconut fruits to be used in cooking snail at the shanty of Arcenio, then Angelito arrived and asked him about the usage of that coconut milk Rodrigo answered that it will be used in cooking the snail, then Angelito uttered joke to quote, “Basin luwaan ni Onyong” unquote, referring to Arcenio. Then suddenly Arsenio went out from the room of his shanty and confronted Angelito then altercation ensued between Arcenio and Angelito.”

Wala ka antos si Arcenio, nikuha kini og lagaraw sa iyang kusina ug dali usab kining gilayog sa pag-umangkon niining si Angelito aron ilugon ang dalang lagaraw.

Nailog ni Angelito ang dalang lagaraw ni Arcenio ug gitigbas gilayon kini. Nahagba si Arcenio sa yuta kinsa samdan adtong tungora sa ulo.

Human nasaksihan ni Rodrigo ang hitabo, dali kining nagpalayo aron mangayo og panabang sa mga silingan, apan sa iyang pagbalik, wala na si Angelito.

“Suddenly Arcenio got a bolo from his dirty kitchen, immediately Angelito grappled Arcenio armed with bolo and took over and hacked Arcenio while Arcenio was on the ground hitting first his head. Immediately Rodrigo after witnessing incident scampered to as help from their neighbor. When he returned Angelito is no longer at the scene.”

Subay sa alegasyon ni Arcenio, gi-ilog ni Angelito ang bitbit niining lagaraw ug mao usab kini gigamit sa iyang pag-umangkon pagtigbas tumong sa iyang ulo.

Nabawi sa uyuan ang iyang lagaraw nga giilog sa iyang pag-umangkon hinungdan nga nakahigayon kini sa pagbawos pagtigbas ngadto sa pag-umangkon.

“As alleged by Arcenio while at BMC that it was his bolo whom grab by Angelito and same used in hacking his head, however, Arcenio manage to take it back and hacked Angelito.”

Daling gidala sa Butuan Medical Center (BMC) si Arcenio sa tabang sa OPSEN human naligo kini sa kaugalingong dugo tungod sa mga samad tinigbasan nga na angkon.

Si Angelito usab, nadala sa Agusan del Norte Provincial Hospital.

Bandang alas-5:30 sa hapon sa samang adlaw, namatay si Angelito samtang kini gitambalan sa mga doktor sa naasoy’ng tambalanan.

“At about 5:30pm of same date Angelito Lor y Raza was expired while undergoing treatment at Agusan del Norte Provincial Hospital, Libertad Butuan City.”

Narekober sa kapulisan sa crime scene ang 2-feet nga gitas-on sa lagaraw nga nagkadugo.

Sa pagsulat niini nga balita, wala pay aksyong legal nga gihimo ang kabanay sa mga nahisgutan. 

Gipangbangagan nga Kalsada Gireklamo

Ni Alex Mapoy

Gihimong pagbangag-bangag sa kalsada, delikado sa disgrasya.
BUTUAN CITY – Wala gikalipay sa pipila ka mga biyahidor o mga residente dinhe sa siyudad nga mag-agian sa Montilla Boulevard padulong sa Brgy. San Vicente tungod sa kangil-ad sa kalsada.

Nasuta nga dunay gihimong pag-repair sa nahisgutang kalsada diin ang pipila ka bahin niini ang gipangbangag-bangagan.

Ikalipay unta sa mga biyahidor ug mga residente ning siyudad nga regular nga mag-agian sa nasangpit nga kalsada sanglit kon mahuman ang gihimong pag-rehab sa kalsada, nindot naman unya kini nga pagaagian sa nagkadaiyang matang sa sakyanan sama sa motor.

Nakapait lamang sa gihimo sa contractor sa nahisgutang kalsada, igo lang gibangag-bangagan ang pipila ka bahin niini, gibiyaan, ug wala gani gibutangan og marking ang nahisgutang dapit nga kini “under repair o under construction.”
Alang ni Jun, usa ka motorista, delikado ang gihimo sa contractor nga gibangag-bangagan ang maong kalsada ug wala gani butangi og signage aron makabantay ang  driver sa sakyanan nga i-reduce ang dagan kay peligro ang maong dapit.

Hulagway sa kalsada nga gipangbangagan.
Pamugos ni Jun, angay unta butangan og signage ang maong dapit nga gipangbangag-bangagan aron walay mahitabong disgrasya sa naasoy’ng dapit.

Argumento pa sa nahisgutan, matumba man gani nang motor nga gamay lang bato ang maligsan, unsa pa kaha kanang kalsada nga gipangbangag-bangagan.

Dihang gisubay sa News Team ang maong kalsada, personal nga nasaksihan ang pipila ka bahin sa maong kalsada nga gipang-bangag-bangagan ug wala gani pangbutangi og signage aron makabantay ang motorista nga mo agi sa maong lugar.

Pangutana ni Jun, “kanus-a pa butangan sa contractor og signage ang maong dapit? Anha pa ba kini butangan kon dunay madisgrasya tungod sa ilang iresponsableng gihimo?”

Subay niini, naningkamot ang mantalaan nga mailhan ang contractor sa nahisgutang dapit aron ipaabot ang mulo sa katawhan sa ingon mabutangan og signage ang dapit nga ilang gipang-bangag-bangagan.

Surigao Area Gilinog

Ni Alex Mapoy
Courtesy of Philippine Institute of Volcanology
and Seismology (PHIVOLCS).
BAYABAS, Surigao del Sur – Gitay-og sa 3.6 magnitude nga linog ang lungsod sa Bayabas pasado alas-3:39 kagahapon sa kaadlawon.

Sa datos sa Philippine Institute of Volcanology and Seismology (PHIVOLCS), nasuta nga ang epicenter sa maong pagtay-og, anaa sa lungsod sa Bayabas.

Nasuta nga duna kini gilagmon nga 36 kilometros ug gitumbok nga tectonic ang hinungdan sa paglihok sa yuta.

Sa maong gikusgon, walay gipagawas nga pahimangno ang ahensya nga dunay mo sunod nga mga aftershocks tungod sa kahinay niini.

Una niini, gitay-og sa 2.6 magnitude nga linog ang lungsod sa Burgos, Surigao del Norte adtong alas-7:00 sa gabii, Lunes.

Natumbok sa Phivolcs nga ang sentro sa maong pagtay-og makita sa sidlakang bahin sa naasoy’ng lungsod.
Duna kini gilagmon nga 31 kilometros ug tectonic ang hinungdan sa pagtay-og.

Walay gikataho nga dunay kabtangan nga naguba o nadaut nunot sa maong paglihok sa yuta nga ni igo sa duha ka mga lungsod sa managlahing probensya.

Hisayran nga sa entrada pa lang niining bulana, gi-igo sa 2.1 magnitude nga linog ang lungsod sa Burgos, apan, wala kini nibilin og damyos sa kabtangan sa mga residente sa naasoy’ng dapit.

Monday, April 6, 2015

Daghang Reklamo Gidawat

Ni Alex Mapoy

POEA Caraga Senior Labor Employment Officer
and Coordinator Meriam R. Balmocena
BUTUAN CITY – Gikomperma sa kadumalahan sa Philippine Overseas Employment Administration (POEA) Caraga nga daghang reklamo ang madawat sa buhatan kada adlaw.

Basi sa banabana sa buhatan, dili mo ubos sa 30 ug dili usab mo lagpas sa 100 ka mga reklamo ang ilang madawat.

Sumala ni POEA Caraga Senior Labor Employment Officer and Coordinator Meriam R. Balmocena, nagkadaiyang reklamo ang ilang nadawat gikan sa nahibiling kabanay sa mga Caraganon Overseas Filipino Workers (OFWs).

Pipila sa mga reklamo nga ilang nadawat kabahin sa problema sa pamilya diin ang kabanay nga OFW, wala na nagpadala og binulang allotment; kalapasan sa employment contract tali sa empleyado batok recruitment agency ug sa langyaw nga amo; ug daghan pang uban.

Dugang ni Balmocena, tanang reklamo nga gipaabot sa mga kabanay sa mga Caraganon OFWs ang ilang gihatagan sa pagtagad pinaagi sa paghatag giya kon unsay angayan niining buhaton.

Tuyo sa opisyal nga tanang gipaabot nga reklamo ang ilang mahatagan sa igong pagtagad aron ang interes sa na dehado nga partido ang mahatagan og kahusayan.

Alayon niini, gikalipay sa opisyal ang gihimong pagdangop sa mga nahisgutan sa ilang reklamo sa buhatan sanglit nagpakita lamang kini nga dunay pagsalig ang katawhan kanila.

Subay niini, gi-awhag sa opisyal ang mga kabanay sa Caraganon OFWs nga kon ugaling dunay dunay reklamo nga gustong ipaabot, mas maayong dili kini magpanuko sa pagdangop sa buhatan sanglit andam nila kining paga-alagaran.

Alang sa opisyal, ang reklamo magpabiling reklamo kon dili kini idangop sa ilang buhatan aron mahatagan sa hustong kasulbaran.

No Registration Multahan

Ni Alex Mapoy

DOTC Caraga Officer-In-Charge Assistant Regional Director Abdul
Fatah M. Gumaos. 
BUTUAN CITY – Estriktong gipatuman sa kadumalahan sa Department of Transportation and Communications (DOTC) Caraga ang Memorandum Circular No. AVT – 2015 – 1927 nga giilang No Registration, No Travel Policy sukad adtong Miyerkules Santo, Abril 1, 2015.

Gikabutyag ni DOTC Caraga Officer-In-Charge Assistant Regional Director Abdul Fatah M. Gumaos, estrikto nila kining ipatuman ang maong palisiya.

Dugang ni Gumaos, adiser gipatuman ang nasangpit nga kamanduan, gipatawag una nila ang tanang dealer sa 4-wheeled motor vehicle aron i-obliga nga ihatag na ang Official Receipt (OR) ug Certificate of Registration (CR) sa nahalin nga yunit ngadto sa kliyente.

Gituyo kini aron dili maipit ang nakapalit sa yunit sa higayong pahunungon kini sa law enforcer ug wala nay igong rason pa ang mga dealer og sakyanan nga dili makahatag og OR/CR sa ilang kliyente sanglit napasidan-an na kining daan sa ahensya.

Katuyuan niini nga dili mapahamtangan og multa ang nakapalit sa maong yunit diin liboan ka pesos ang mabayran niadtong makalapas sa nasangpit nga mandato.

Gipasabot sa opisyal, pito lamang ka adlaw ang gihatag nga konsiderasyon sa ahensya ngadto sa tag-iya og sakyanan kon ugaling bag-o pang napalit ang maong yunit.

Magsugod ang kwentada sa pito ka adlaw sa petsa sa pag-submit o pagdawat sa Land Transportation Office (LTO) sa aplikasyon sa rehistrasyon gikan sa dealer.

Kon ang yunit, gimaneho ug na “intercept” sa law enforcer sulod sa maong period, sumala ni Gumaos, hatagan ang tag-iya og konsiderasyon kon walay ikapakita nga OR/CR, basta aduna lamang kini ikapakita nga Sales Invoice o resibo sa pagpalit sa naasoy’ng sakyanan.

Sa higayong mo lapas na sa 37 ka adlaw gikan sa petsa sa pagpalit sa yunit nga nakalatid sa Sales Invoice, ang sakyanan, i-impound kini sa law enforcer.

Kon ugaling walay plaka nga ikapakita gumikan kay walay available nga plaka ang LTO, apan, dunay nahuptang CR/OR ang tag-iya, gipasalig sa opisyal nga pinakadugay na ang 45 ka adlaw, ma-release na dayon ang plaka sa maong sakyanan.

Gipasalig usab sa opisyal, bastante ang plaka sa buhatan sa kasamtangan hinungdan nga imposibleng dili mahatagan og license plate ang yunit nga girehistro.

Gihimong basehan sa pamahayag ni Gumaos mao ang nakalatid sa Memorandum Circular No. AVT – 2015 – 1927 kansang kamanduan, ipatuman ngadto sa tanang 4-wheeled motor vehicle.

“Starting 01 April 2015, no four (4)-wheeled motor vehicle can be used, driven or operated on the roads without being duly registered with the Land Transportation Office (LTO) pursuant to R.A. 4136, Joint Administrative Order No. 2014-01 and other applicable rules and regulations.

(1.) Any vehicle without license plates shall be stopped and the driver must present the Certificate of Registration (CR) and Official Receipt (OR) of the vehicle;

(2) If only CR/OR are presented, a fine of Php 5,000.00 shall be imposed for failure to attach the plates;

(3) In case Special Plates were applied for, the driver must present the OR for the payment;

(4) If without CR/OR, the driver must present the following: a. Certificate of Stock Reported; b. Sales Invoice, which must be dated within seven (7) days prior to the apprehension; and (c) Certificate of Insurance Cover, which must be dated on or after the date of the Sales Invoice.

(5)  In the absence of any of the above, the vehicle owner shall be fined the amount of Php 10,000.00 for using an unregistered vehicle and the driver shall be fined the amount of Php 1,000.00 and cited for reckless driving;

(6) Further, if at the time of apprehension the date of the Sales Invoice exceeds thirty-seven (37) days from the date of purchase, the vehicle shall be impounded;

(7)  This is without prejudice to the liability of the concerned manufacturer, assembler, importer and dealer; and

(8) All apprehensions may be contested within five (5) days therefrom."

By-Pass Line Hapit Na Nahuman

Ni Alex Mapoy

Courtesy of Butuan City Water District
BUTUAN CITY – Hapit na mahuman ang gitaud nga “permanent by-pass line” nga gimuntar sa Butuan City Water District (BCWD) diha sa Sitio Iyao, Barangay Anticala ning siyudad.

Segon ni BCWD Senior Public Relations Officer Ramil Barquin, magsilbi kining “extraction point” sa water district sa i-suplay nga tubig gikan sa suba sa Taguibo.

Hisayran nga namugna ang maong pasilidad tungod sa dakong damyos nga nabilin sa bagyong Seniang sa Infiltration Gallery.

Pinasikad sa gihimong ebalwasyon human sa nasangpit nga kalamidad, girekomenda nga angayan nang i-rehab ang Infiltration Gallery labi na nga ang tibuok istraktura maagian sa baha.

Sa gihimong tigum tali sa Technical Staff sa BCWD ug Task Force Tubig sa Local Government Unit (LGU) Butuan, gipresentar ang desinyo sa by-pass line ug gipasabot nga pinaka-epektibo kining alternatibo sa pag-extract sa tubig gikan sa suba sa Brgy. Taguibo.

Subay niini, nipasalig si Butuan City Mayor Dr. Ferdinand Amante, Jr. nga mo tabang sa water district pinaagi sa paghatag sa ayudang pinansyal balor P1,200,000 alang sa konstraksyon sa nasangpit nga pasilidad.

The permanent by-pass line was conceptualized after the result
of the evaluation of the damage incurred by the Infiltration
Gallery after Tropical Storm Seniang. Courtesy of BCWD
Katuyuan sa pagtunol sa maong pundo nga mapadali paghuman ang naasoy’ng pasilidad aron hingpit kini nga mapahimuslan sa tanang konsumidor nga Butuanon.
Ang nahisgutang pundo kuhaon sa gi-alokar sa Department of Budget and Management (DBM) nga emergency fund balor P35,000,000 kansang pundo gigahin human napailawom sa State of Water Crisis ang tibuok siyudad.

Tungod sa gihimong pasalig ni Amante, segon ni Barquin, gipadayon sa water district ang maong by-pass line sa ingon masugdan gilayon kini.

Bisan wala pa nadawat sa water district ang gipasalig sa amahan ning siyudad nga kantidad P1,200,000, daling namalit ang BCWD og uPVC pipes nga gikinahanglan alang sa pagsugod sa konstraksyon.
“Having Mayor Amante’s commitment, BCWD pushed through with the construction works keeping in mind the P1,200,000.00 funds from the Butuan City LGU. Although the said funds were not yet given, BCWD processed an emergency purchase of uPVC pipes needed to start the construction. After the Engineering Plan was finalized, on March 5, 2015, the construction works of the permanent by-pass line commenced.

As of press time, the construction of the permanent by-pass line is already 95% complete despite the fact that the committed amount of P1,200,000.00 by Mayor Amante was not realized. Pipe lying of the two parallel lines of 300mm uPVC is already finished. Remaining works will only be the interconnection of these lines to the tapping point of BCWD’s main transmission line,” tipik sa mensahe ni Barquin.

Offsite Satellite Registration Sugdan

Ni Alex Mapoy

BUTUAN CITY – Lauman nga usa niining mga adlawa, sugdan sa Commission on Election (Comelec) Butuan ang pagpahigayon og Offsite Satellite Registration diha sa Robinson’s Place Butuan.

Tumong niini nga mahatagan og kahigayonan kadtong mga botanteng Butuanon nga makapa-rehistro ug makapa-validate sa daang rehistrasyon sa ingon makuhaan kini og biometrics.

Inisyatiba kini nga gihimo sa kadumalahan ni Acting City Election Officer Faith P. Tranquilan human hingpit nga natapos ang gipahigayong Barangay Satellite Registration sa komisyon ning siyudad.

Gi-angkon ni Tranquilan nga bisan gipaduol na sa komisyon ang serbisyo ngadto sa katawhang Butuanon, apan dili sento porsyento ang mga nakaparehistro nga nakapa-validate sa rehistrasyon ingon man nakapa-rehistro hinungdan nga isip paningkamot nga makabotar ang tanang Butuanon sa sunod tuig nga pili-ay, subleng dalhon ang serbisyo ngadto sa shopping mall.

Alang ni Tranquilan, epektibo kini nga paagi sanglit mausa naman unya ang panahon nga igahin sa mga botante pagpa-rehistro o pagpa-validate sa rehistrasyon kon dalhon ang serbisyo ngadto sa mall.

Gitin-aw sa opisyal, gawas nga mag-shopping ang mga Butuanon sa nahisgutang mall, mahatagan pa kini og kahigayonan nga makapa-rehistro o kaha makapa-validate sa rehistrasyon.

Hisayran nga adtong Marso 12 ning tuiga, hingpit nga gitapos sa komisyon ang gihimong pagpangrehistro o pag-validate sa rehistrasyon sa kabarangayan.

Gawas sa pagdala sa serbisyo ngadto sa mall, mahimo usab nga makadalikyat ang mga Butuanon sa ilang buhatan aron makapa-rehistro o kaha makapa-validate sa daang rehistrasyon.

Una nang giklaro sa Comelec Central Officer nga bugtong makasalmot sa eleksyon sunod tuig mao lamang kadtong dunay “biometrics,” diin kadtong walay biometrics, ang awtomatiko kining dili maka-apil sa maong eleksyon.

Langkob sa biometric ang hulagway sa botante, thumb mark, ingon man perma.

Subay niini, gi-awhag sa opisyal ang tanang Butuanon nga magpa-rehistro na o kaha magpa-validate sa daang rehistrasyon aron kini makaapil sa sunod tubig nga piliay. 

Nanghawod sa Klase Nagpasalamat

Ni Alex Mapoy

BUTUAN CITY – Kinasingkasing nga nagpaabot og pagpasalamat ang mga estudyante nga nahimong benepisyaryo sa nagtunhay nga Pantawid Pamilyang Pilipino Program (4Ps) sa Department of Social Welfare and Development (DSWD) Caraga.

John Renner H. Virtudazo of  Purok 7, Barangay 
Sta Cruz, Manila de Bugabus, Butuan City. 
Class Valedictorian.DSWD Photo File
Basi sa datos nga gihikyad ni DSWD Caraga 4Ps Regional Information Officer II Ryan Malbas Tapayan, dunay 22,901 ka mga estudyante ang ni-gradwar sa sekondarya samtang 42,692 ang nakahuman sa elementarya.

Pulos lumad nga taga – Caraga ang mga nahisgutan.

Butyag ni Tapayan, gipahayag sa opisyal nga mayorya sa mga estudyante nga natabangan sa 4Ps kinsa nigradwit, ang nanghawod pa sa klase.

Pipila sa mga  natabangan nga nakagradwar ug nanghawod sa klase mao sila John Renner H. Virtudazo, residente sa Purok 7, Barangay Sta Cruz, Manila de Bugabus; Rejean D. Baldo, nagpuyo sa Barangay Camayahan; ug Maria Belinda D. Campana, nanimuyo sa Barangay Bilay pulos sakop ning siyudad.

Sa bahin ni Virtudazo, gipahayag niini nga ang diyutay’ng dungog nga na angkon, usa lamang ka sinugdanan alang sa pagkab-ot sa kausaban sa kinabuhi nga gipangandoy sa iyang pamilya ug sa iyang kaugalingon mismo.

Class Valedictorian Rejean D. Baldo of Barangay Camayahan, 
Butuan City. Class Valedictorian.  DSWD Photo File
“Ang munting karangalan po na ito ay tunay na simula ng magandang pagbabago sa buhay ko at ng aking pamilya. Maraming salamat po sa Pantawid Pamilya," pahayag ni Vertudazo.

Si Baldo usab, nagbutyag nga nahimong kaabag ang 4Ps sa ilang pamilya nga siya makalampos sa pagtungha ug paghimong lig-on kanila pag-atubang sa mga hagit sa kinabuhi.

"Ang Pantawid Pamilya ay naging kaakibat po namin sa pagharap sa mga hamon ng buhay. Kundi po dahil sa Pantawid, hindi ko po sana nakamit ang aking munting pangarap na magtapos ng Class Valedictorian. Salamat po sa Pantawid," mensahe ni Baldo.

Maria Belinda D. Campana of Barangay Bilay, 
Butuan City. Class Valedictorian. 
DSWD Photo File
Alang usab ni Campana, nakatabang og dako ang 4Ps sa ilang kinabuhi labi na sa pagkab-ot sa pormal nga edukasyon.

Pamugos ni Campana, tungod sa maong programa, nahimo silang lig-on pag-atubang sa lisud nga kahimtang sa pamuyo nga maoy naghatag kanila sa tim-os nga kalipay ug buhi nga paglaum.

"Ang Pantawid Pamilya po ay naging kaagapay namin upang humarap sa buhay ng may kagalakan at pag-asa. Dahil po sa Pantawid, nagkaroon po ng direksyon ang aking mga pangarap," pahayag ni Belinda.

Ang tulo ka mga estudyante ang nilampos sa pagtungha isip Class Valedictorian kansang dungog angayang kapanaminan sa uban alang sa pagkab-ot sa damgo sa kinabuhi.

Mapasalamaton usab ang mga nahisgutan sanglit gumikan sa nasangpit nga programa, natabangan sila pagkab-ot sa pormal nga kahibalo ug magiyahan sa pagtahak o pagsubay sa dalan sa kalamposan.