Maternity Puwede sa Dalaga

Ni Alex Mapoy

MATERNITY BENEFIT: Giklaro ni SSS Butuan Assistant Branch Head Arnold Pepino nga wala nay distinction karon sa minyo ug dalaga sa pag-avail sa maternity benefits. Photo by Alex Mapoy

BUTUAN CITY – Dili na limitado ang maternity benefit sa minyong babae nga membro sa Social Security System (SSS) kondi mahimo usab kining mapahimuslan sa membro nga dalaga kon kini manganak.

Sumala ni SSS Butuan Assistant Branch Head Arnold Pepino, minyo man o dalaga basta manganak unya membro sa ahensya, makapahimulos kini sa maternity benefit.

Ang membro nga manganak, mapahimuslan niini ang maternity leave plus daily cash allowance tungod sa kapakyas pag-report sa trabaho tungod sa pagpanganak.

Kon normal ang pagpanganak, 60 ka adlaw lamang ang ma-avail nga maternity leave sa membro, apan kon caesarean, moabot sa 78 ka adlaw ang maternity leave niini.

“Oh. Wala nay distinction karon sa minyo ug dalaga sa pag-avail sa maternity benefits. Kon normal ang pagpanganak, 60 days leave, apan kon caesarean, 78 days leave. Sa mga adlaw nga wala na trabahoan sa trabahante, 100% ang ihatag sa SSS katumbas sa duha ka bulan niini nga sweldo,” pagpasabot ni Pepino.

Ang maternity benefit nagpasabot nga daily cash allowance nga gigarantiya alang sa babae niining membro kinsa wala nakasulod sa trabaho tungod sa pagpanganak o nakuhaan.

Mapahimuslan kini nga benepisyo hangtod lamang sa unang upat ka pagpanganak o nakuhaan basi sa nakalatid sa Republic Act (RA) 8282 o mas nailang Social Security Act of 1997.

Kon ang membro nga nanganak o napunitan wala nakahatag sa gikinahanglang kontribusyon tungod sa wala pag-remit sa employer, obligahon sa buhatan ang employer pagbayad sa damyos katumbas sa madawat nga benepisyo sa hingtungdang membro.

Samtang, kon ang membro nasakit sulod sa mga bulan nga gibayran kini sa maternity benefit, basi sa balaud, dili kini maka-avail sa sickness benefit sanglit wala kini gitugot nga ang membro makapahimulos sa duha ka benefits sa samang period.

“A female member cannot claim for sickness benefit for a period of 60 days for normal delivery or miscarriage or 78 days for caesarean delivery within which she has been paid the maternity benefit. As a rule, no member can be entitled to two benefits for the same period.”