2015 Census Gilusad

Ni Alex Mapoy

Gidasig nila PSA Caraga Interim Regional Director Dr. Rosalinda 

Celeste – Apura ug NEDA Caraga Regional Director Mylah Faye 

Aurora B. Cariño ang tanang Caraganons nga “Magpabilang. 

Magpa-Census” subay sa paglusad sa 2015 Census 

of Population. Photo by Alex Mapoy

BUTUAN CITY – Pormal nang gilusad sa Philippine Statistics Authority (PSA) Caraga ang 2015 Census of Population diha sa Robinsons’ Place Butuan, Lunes sa hapon.

Sugdan ang pagpahigayon og census karong Agosto 10 ug mahuman kini karong Setyembre 6 sa kasamtangang tuig.

Mokabat sa 2,770 ka mga field personnel ang ipakatag sa rehiyonal nga buhatan sa tibuok rehiyon.

Sa kinatibuk-ang ihap, 2,054 niini mga Enumerators, 534 ang Team Supervisors, 134 mga Census Area Supervisors (CAS), 34 ka Head Census Area Supervisors, ug 14 ka mga CAS Supervisors kinsa maoy ipakatah sa lima ka mga probensya nga naglangkob sa Agusan del Norte, Agusan del Sur, Surigao del Norte, Surigao del Sur, ug Dinagat Island Province.

Subay niini, giawhag ni PSA Caraga Interim Regional Director Dr. Rosalinda Celeste – Apura ang tanang Caraganons nga magpa-Census sa ipakatag nga personahe ug ihatag ang hustong detalye.

Dugang ni Apura, ang malakip sa Census mao kadtong natawo sa Agosto 1, 2015 alas-12:01 sa kadlawon pa atras ug kadtong mga tawo nga namatay paghuman sa alas-12:01 sa maong petsa.

Samtang, walay labot nga i-census kadtong natawo adtong Agosto 1 ning tuiga nga nilagpas sa alas-12:01 sa ka adlawon ug kadtong indibidwal nga namatay adiser ang Agosto 1, 2015 alas-12:01 sa kadlawon.

Ang kalihokan sa PSA Caraga ni-ani ug suporta gikan sa nagkadaiyang ahensya sa goberno sama sa National Economic Development Authority (NEDA) Caraga ug daghan pang uban.

Bugtong awhag ni NEDA Caraga Regional Director Mylah Faye Aurora B. Cariño sa tanang Caraganon, “Magpabilang. Magpa-Census!”

Pasabot sa opisyal, importante ang mga datos nga makuha sa mga field personnel sa PSA Caraga sanglit magamit kini sa umaabot nga mga lakang pagahimoon sa kagamhanan.

Alayon niini, lauman na lamang sa katawhang Caraganons nga karong Agosto 10, dunay mga personahe gikan sa PSA Caraga ang manumbay aron magpahigayon pag-Census.