75 Klaseng Mananap Gitunol

Ni Alex Mapoy

SURIGAO DEL NORTE – Setentay singko ka mga klaseng kahayopan ang hingpit nga natunol nga 19 ka mga mag-uuma ug 3 ka hugpong sa mga mag-uuma sa naasoy’ng probensya.

Gilangkoban kini sa 15 ka mga manok bisaya, 25 ka mga kabaw, 4 ka mga baka, 26 ka mga kanding, ug 5 ka mga baboy.

Subay niini, gipahimangnoan ni Provincial Veterinarian Dr. Life Shiela Laugo ang tanang benepisyaryo nga atimanon pag-ayo ang nadawat nga kahayopan aron kini managhan ug matabangan ang inadlaw niining panginabuhian.

Sumala ni Department of Agriculture (DA) Caraga Information Officer I Fretcher Magatao, gikalipay pag-ayo sa mga benepisyaryong mag-uuma ang nadawat niining hayop.

Gipahayag matod pa ni Jerson Calamba, usa sa mga benepisyaryo sa nasangpit nga dispersal program kinsa nagpuyo sa lungsod sa Socorro, nakatabang ang nadawat niining mananap sa inadlaw nilang panginabuhi.

Saad ni Calamba, amomahon nila ang nahisgotang mananap nga gihatag ug gisalig sa ahensya kanila sanglit dako kini og ikatabang sa ilang kinitaan.

Mismo si Governor Sol Matugas ang nipadayag nga nahimong kaabag ang ahensya sa mga Surigaonon labi na ngadto sa mga mag-uuma aron maseguro nga makab-ot ang “food sufficiency” dili lamang sa probensya kondi sa tibuok rehiyon.

Alang sa gobernadora, makatabang ang dispersal program sa katawhan ug sa maong paagi, mapakusog ang livestock industry ning rehiyon.

Ang 75 ka mga mananap nga natunol ngadto sa mga benepisyaryo nagkantidad kini og P1.179 kansang pundo gikuha gikan sa rehiyonal nga buhatan.