Water District Gitambagan

Ni Alex Mapoy

BUTUAN CITY – Pipila ka mga konsumidor sa Butuan City Water District (BCWD) ang nipaabot sa ilang tambag kabahin sa paghatag sa pinakaulahing impormasyon gikan sa buhatan.

Sumala ni Bebie Sarco, usa ka yanong konsumidor, dunay 5 ka buok estudyante, mas maayo matod pa nga maghimo og usa ka information system ang water district aron mapadali ang pagpadangat sa pinakaulahing impormasyon ngadto sa tanang konsumidor.

Dugang ni Sarco, angayan nga kuhaon sa water district ang cellphone number sa matag konsumidor ug ibutang sa namugnang information system.

Katuyoan matod pa sa nauwahi, pinaagi sa paghimo ug information system, sa isa lamang matod pa ka send, tanang cellphone number nga naka-save sa maong system ang makadawat kon unsay adjustments o kaha advisories, ingon man programa nga gihimo sa naasoy’ng buhatan.

Pamugos sa maong inahan, importante kaayo kini sanglit sama kaniya nga dunay lima ka buok estudyante, pait kaayo matod pa nga kalit mawala ang suplay sa tubig labi na ning panahon sa ting-ulan.

Ang nakabentaha matod pa sa maong sistema, sa dili pa mawala ang suplay sa tubig, maabisohan nang daan ang tanang konsumidor nga nianang orasa, mawala ang suplay ug niana, makapangandam ug makatigom gilayon og igong tubig ang tanang konsumidor.

Gitin-aw sa nauwahi, bisan nihatag matod pa siya og tambag, apan iyang gi-angkon nga duna pa gihapon siyay kasuko sa water district sanglit panahon sa ting-ulan, mahasol siya pag-ayo sanglit walay tubig nga magamit.

Apan alang usab kaniya, kon pulos lamang matod pa kasuko ang ipahari sa iyang kasingkasing ug dili motabang pagpangita og paagi nga masulbad ang maong suliran, hangtod sa hangtod, mamatay na lamang matod pa ang hingtungdang konsumidor, ang suliran – magpabilin.

Isip matod pa usa sa mga konsumidor, mas maayo matod pang aksyonan ang yano niining tambag o suhestiyon ug sa maong paagi, duna siyay ikatampo alang sa pagpanindot sa serbisyo sa buhatan.