Paningkamot sa Piniriso Gidayeg

Ni Alex Mapoy

BUTUAN CITY – Gidayeg sa kadumalahan sa Social Security System (SSS) Butuan ang paningkamot sa mga piniriso nga makahatag og binulang kontribusyon ngadto sa ilang buhatan.

Hisayran nga bisan panagsa lamang makakwarta ang mga binilanggo, apan nakahimo pa gihapon kini og pagtipig sa pipila ka peso gikan sa kinitaan sulod sa prisohan pinaagi sa paghulog sa kaugalingong AlkanSSSya.

Daan nang gikomperma ni Jail Officer 1 Psychie B. Macagaan, ang Inmates Welfare and Development Officer and Community Relations Service Officer sa Butuan City Jail (BCJ) nga pipila sa mga piniriso ang nakatigom og kapin isa ka libo.

Subay niini, gitambag ni Assistant Branch Head Arnold Pepino ngadto sa tanang piniriso nga ipadayon ang pagtipig sa pipila ka peso gikan sa gamay niining kita sulod sa prisohan sanglit dako kini og ikatabang sa umaabot panahon.

Dumduman nga atol sa paglusad sa AlkanSSSya Program, gipasabot mismo ni SSS AVP Northern Mindanao Division Atty. Edwin Alo nga ang pagka-membro sa SSS maghatag kasegurohan sa hayag niining kaugmaon.

Tambag sa nauwahi, batasanon lamang ang paghulog sa kaugalingong AlkanSSSya sanglit walay laing makapahimulos niini sa umaabot kondi ang nagtipig ra usab sa maong salapi.

Ang pagka-priso matod pa, dili makonsiderang babag aron ang matag usa, makabaton og tinigom ug kon kini makagawas na o kaha mahimo nang gawasnon, duna kini kapaninguhaan o himuong capital sa tukuron unya niining gamay nga negosyo.