Thursday, November 12, 2015

BMC Giwarningan sa CSC

Ni Alex Mapoy
CSC Caraga Regional Director Resurreccion P. Pueyo
BUTUAN CITY – Gi-warningan sa rehiyonal nga buhatan sa Civil Service Commission (CSC) Caraga ang kadumalahan sa Butuan Medical Center (BMC) ug ubang buhatan sa goberno kabahin sa isyu sa pagkalangan pag-atiman ngadto sa mga kliyente.

Kahinumdoman nga mireklamo ang pipila ka mga buros sanglit nalangan sila pag-atiman sa naka-duty nga doctor gumikan kay nagpa-anak pa kini ug nag-caesarian.

Bugtong tuyo lamang sa mga nahisgotan nga madugangan ang ihap sa mga doctor nga mag-duty kada adlaw sa maong tambalanan aron gawas nga dili mabugbog-sarado ang doctor nga nag-duty tungod sa kadaghan sa pasyente, dili usab sila ma-hostage sa tibuok adlaw nga paghulat sanglit ang unahon pag-atiman mao man kadtong mga nanganak kaysa kanila nga magpa-prenatal.

Sumala ni CSC Caraga Regional Director Resurreccion P. Pueyo, kon magpermi na lang og “violate” ang BMC ingon man ang ubang opisina sa goberno sa probisyones nga gibandera sa Citizens Charter, angay manubag ang nagdumala niini.

Pamugos ni RD Pueyo, dili lang pang-display ang gibandera nga Citizens Charter kondi unsay gisaad niining serbisyo, angay kining tumanon.

Miangkon usab ang direktor, dunay mga higayon nga ma-bise ang personahe hinungdan nga malangan pag-atiman ang mga kliyente ug sa maong kahimtang, angay usab kini nga sabton sa katawhan.

“Halimbawa sa taas na nga mga adlaw, semana, bulan wala nila na meet ang ilang gi-promise nga gipakita ug gisulat sa ilang Citizens Charter nga frontline service, may deperensiya na. Pero kon halimbawa, sa usa ka takna ra, sa usa ka sitwasyon ra, tungod sa ka bise sa tanan sama sa imong gisulte ganiha, dapat sabton na lang pod sa atong mga kliyente,” pagpasabot ni RD Pueyo.

Apan gipamugos sa opisyal, kon kanunay na lamang nga malangan ang personahe sa gobernong buhatan pag-atiman sa mga kliyente sama sa BMC, angay sila nga manubag sa nadismaya nga mga kliyente.
“We will not make it an excuse to continuous violates the Provision of the Citizens Charter as promise by every government agency and every government office,” pasidaan sa direktor.

Sa bahin ni BMC Assistant Hospital Director ug General Surgeon Dr. Andre C. Malbas, gipasalig niya nga maningkamot ang ilang mga doctor nga maatiman gilayon ang ilang mga pasyente o kliyente kada adlaw.

Niangkon usab si Dr. Malbas nga malangan pag-atiman ang ilang mga pasyente sanglit gamay ra man usab ang ilang mga doctor kon itandi sa nidagsa nga mga pasyente.

Mihangyo usab ang opisyal nga sabton sila sa ilang kliyente, apan bugtong tubag sa CSC, masabtan sa kliyente kon niana lamang higayona nahitabo, apan kon magpermi, duna na usab matod pay deperensya.

Aminado usab siya nga dunay nakabandera nga Citizens Charter kansa nagsilbi matod pa nilang reminder aron matuman ang ilang commitment subay sa nakalatid.

“We will try our best matuman na siya. Although, medyo naa gyud tay shortcomings gamay tungod anang personahe nato, mga doctor nato, gamay ra gyud. Pero, we are trying our best nga dili gyud na madugay. Mao bitaw na gibutang diha as reminder, reminder na. Although, expected gyud na by nga daghay mangreklamo gyud kay we cannot please everybody. Katungod nila nga magreklamo. Mao lagi na, they should also understand kay ang volume sa atong patient karon dako, ang atong personnel wala nagdako. Steady ang atong personnel. Nangawa pa gani ang uban,” pagpasabot sa opisyal.

Ang Citizens Charter namugna tungod sa Republic Act 9485 o mas nailang Anti-Red Tape Act of 2007.

Tanang nakalatid sa Citizens Charter mao ang commitment sa hingtungdang opisina sa goberno kon unsa nga mga serbisyo ang makuha sa mga kliyente. Ang gidugayon sa pagkompleto sa transaksyon gipatik sibo sa ilang kasinatian sa pag-atiman.

Subleng giklaro sa CSC nga ang Citizens Charter dili pang-display kondi unsay nakalatid nga mga serbisyo ug kadugayon pagkompleto sa transaksyon, angay kini nga pagasundon.

“Sa Citizens Charter kon unsa nga serbisyo ang gibutang didto, tumanon ninyo kay mao na ang atong standard karon sa pagpanilbihan sa goberno. Dili lang pang-display. Unsa may nakabutang dinha, halimbawa, sulod sa 30 minutos, mahatag ang serbisyo,” pagtin-aw ni RD Pueyo.

No comments:

Post a Comment