Thursday, November 12, 2015

Organic Rice Price, Kontrolahon?

Ni Alex Mapoy
DA Caraga Field Operations Division Chief Rebecca R. Atega
BUTUAN CITY – Bunga sa grabeng pagsulbong sa presyo sa organic rice, plano sa Department of Agriculture (DA) nga kontrolahon ang presyo sa merkado.

Hisayran ang presyo sa organic rice mo duwa gikan P40 hangtod P80 sa merkado taliwal pa man nga dili gastoso ang pagpatubo sa humay.

Sumala ni DA Caraga Field Operations Division Chief Rebecca R. Atega, angay lamang usab nga i-regulate ang presyo sa organic rice aron “affordable” kining mapalit sa tanan.
Basi sa obserbasyon ni Atega, dunay organic rice nga gibaligya sa tag – P40, P45, P55 ug mas subra pa.

Gitin-aw sa opisyal, dunay suhestiyon nga giduso ngadto sa National Organic Agriculture Board kabahin sa pag-regulate sa presyo sa organic rice, apan padayon pa kining gipanday.

“Sakto man, dapat dunay regulation sa price. Padayon ang pagpanday aron ma-regulate pod nato ang price nga dili pod siya kaayo mahal ug ma-access sa tanan,” pahayag ni Atega.

Pipila sa mga nakitang hinungdan sa opisyal kon nganong mahal ang humay nga gipadako gamit ang organikong sistema tungod sa labor sa pag-andam sa organikong abuno, puno sa bitamina, dili makadaut, ug gamay pa usab ang suplay, apan taas ang demand.

No comments:

Post a Comment