Langyaw’ng Turista Ipa-deport

Ni Alex Mapoy

BUTUAN CITY – Ipa-deport ang foreign tourist kon kini mapamatud-an nga nilambigit sa kalihokang pulitika dinhe sa Pilipinas.

Pinakabug-at kini nga silot matod pa ni Bureau of Immigration (BOI) Caraga Acting Alien Control Officer Cesar Valdez nga ipahamtang ngadto sa mga langyaw nga turista sa higayon manginlabot kini sa hisgotanang pulitika sa nasod.

Una nang nagpahimangno si Valdez ngadto sa tanang langyaw’ng turista nga ania sa rehiyon sa Caraga nga dili kini mag-apil apil sa kalihokang pulitika sama sa pag-uban sa pagpangampanya sa kandidato, political rally, political assembly, ug labaw na sa paghatag og ayudang pinansyal.

Klaro matod pa ang mando ni Justice Secretary Leila De Lima nga estriktong ipatuman ang nakalatid sa “Operations Order Prohibiting Foreign Tourists in Engaging in Political Activities in the Philippines” nga gipagawas adtong Hulyo 28 sa kasamtangang tuig.

Walay katungod ang mga langyaw’ng turista nga mag-apil apil sa bisan unsang kalihokan sa pulitika sanglit gilimitahan ang ilang pagbansay sa pulitikanhong katungod labi na nga dili sila dinhe residente.

Daan na usab nga gipaneguro sa opisyal nga dili magpanuko ang buhatan pagpagawas og rekomendasyon alang sa deportasyon sa usa ka langyaw nga turista kon kini nilapas sa kamandoan sa Department of Justice (DOJ).