P100K Financial Assistance Gitunol

Ni Alex Mapoy

BUTUAN CITY – Napahimuslan na sa pamilyang Espino ang “monetary incentive” balor P100,000 isip ayudang pinansyal sa nahibiling kabanay sa empleyado.

Ang monetary incentive gitunol sa rehiyonal nga buhatan sa Civil Service Commission (CSC) Caraga ubos sa pagdumala ni Regional Director Resurreccion P. Pueyo.

Hisayran nga usa ka empleyado sa Agusan del Sur State College of Agriculture (ASSCAT) nga si Jasper Ian S. Espino ang namatay human nakuryentihan samtang nag-duty sa nakalabay’ng mga bulan.

Sumala ni Pueyo, human nasayran ang gidangatan sa biktimang si Espino, dali nga ni-apruba ang rehiyonal niining buhatan og ayudang pinansyal ilawom sa Pamanang Lingkod Bayani (PLBi) alang sa nahibiling kabanay sa naulahi.

Dugang sa direktor, makatarunganon lamang nga hatagan sa maong insentibo ang nabiling kabanay sa namatay’ng empleyado sanglit namatay kini dihang gihimo ang trabaho.

Gawas sa maong insentibo, napahimuslan usab sa benepisyaryo sa namatay ang scholarship grant gikan sa Technical Education and Skills Development Authority (TESDA) subay sa na aprubahang Memorandum of Agreement (MOA) adtong Desembre 2014 tali sa CSC ug sa TESDA.

Sa bahin usab sa kabanay ni Espino, kinasingkasing kining nagpasalamat sa rehiyonal nga buhatan sanglit gitabangan sila nga makasugod human nawad-an og padre de pamilya nga maoy gisaligan sa ilang pagpakabuhi.