BMC Shortage Imbestigahan

Ni Alex Mapoy

Imbestigahan sa Department of Health (DOH) Caraga kon unsa ka tinuod ang reklamo nga kulang og doctor ang Butuan Medical Center. Nabutang sa level 2 nga kategoriya ang maong ospital, apan kulang ang doctor nga mo atiman sa mga pasyente.

BUTUAN CITY – Imbestigahan sa Department of Health (DOH) Caraga ang isyu sa kakulang sa doctor sa Butuan Medical Center (BMC).

Una nang gi-angkon ni BMC Assistant Hospital Director ug General Surgeon Dr. Andre C. Malbas dihang eksklusibo nga nahinabi ning mantalaan nga kulang ang ihap sa ilang doctor hinungdan nga kasagaran sa mga pasyente ang malangan kon magpakonsulta kini sa maong tambalanan.

Sa estimate sa Assistant Hospital Director, kon madugangan lamang og 25 hangtod 30 o subra pa ka mga doctor ang BMC, makonsidera na nga bastante ang maong ihap ug maatiman gilayon ang mga pasyente nga magpa-admit o kaha magpa-konsulta.

Ang maong suliran dugay na matod pa nga nasinati sa operisyon sa tambalanan, apan hangtod karon, wala gihapon nahatagan sa tino nga kasulbaran.

Gikabutyag ni DOH Caraga Assistant Regional Director Dr. Cesar Cassion, nagdahom ang rehiyonal nga buhatan nga bastante ang ihap sa mga doctor sa naasoy’ng ospital sanglit nipasar kini sa level 2 nga kategoriya.

Kon mabutang sa kategoriya nga level 2 ang usa ka ospital, gipasabot ni Dr. Cassion, bastante ang manpower sa maong tambalanan labi na sa ihap sa mga doctor nga gi-assign sa upat ka mga major services – ang OB-Gyne, Medicine, Surgery, ug Pedia.

Gisugdan pagsusi sa rehiyonal nga buhatan ang maong kakulangon sa ihap sa doctor sa maong ospital adtong Bernes sa hapon ug lauman nga ipagawas ang resulta sulod niining semanaha.

Oras mapagawas ang maong resulta, diha na usab mahibaw-an kon unsay rekomendasyon o aksyon nga himuon sa rehiyonal nga buhatan.

Hisayran nga dagsaon sa gatosan ka mga pasyente kada adlaw ang maong tambalanan sanglit goberno kini nga ospital nga maoy daling kadangpan sa mga kabus nga pasyente.