Gobernong Ospital Gireklamo

Ni Alex Mapoy

BUTUAN MEDICAL CENTER. Mireklamo ang mga buntis nga nagpa-prenatal human dugay kini maatiman sanglit kulang ang doctor sa maong tambalanan

BUTUAN CITY – Usa ka gobernong ospital sa dakbayan sa Butuan ang gireklamo sa pipila ka mga pasyente tungod sa kakulang sa doctor nga mo atiman kanila.

Gikabutyag ni alias Lina, pila na ka higayon siya nga nagbalik-balik sa Butuan Medical Center aron magpa-prenatal, apan dugay kaayo siya maatiman tungod sa kakulang sa doctor.

Dugang ni alias Lina, dili niya mabasol ang OB–Gyne Doctor nga nag-duty nianang adlawa kon dugay maatiman ang mga buros nga magpa-prenatal sanglit “all around” ang trabaho sa maong doctor.

Asoy usab ni alias Inday, “bugbog sirado” ang OB-Gyne Doctor nga mag-duty sa maong gobernong ospital sanglit kon dunay manganak nianang adlawa, ang maong doctor maoy magpa-anak; kon dunay manganak unya i-caesarian, ang maong doctor gihapon ang mag-caesarian; kon tulo ka buok ang i-caesarian, humanon una niya kini pag-caesarian ug pagkahuman, balikon ang mga buros nga naghulat aron ipadayon ang pag-prenatal.

Pamugos sa nauwahi, kon pait ang trabaho sa maong doctor, labaw na usab nga pait sa ilang kabahinan sanglit imbes alas-8:00 kini sa buntag nakaabot sa maong tambalanan, alas-6:30 na sa gabii kini nakauli sanglit natungnan adtong higayona nga tulo ka buok ang gi-caesarian.

Naningkamot matod pa siya nga magsayo pag-adto sa ospital aron sayo usab kini makapauli sanglit duna pa kini laing lakaw.

Gikan sa pagpa-anak, pag-caesarian, ug pag-prenatal maoy routine nga trabaho sa OB-Gyne doctor kon kini mo duty sa maong ospital sanglit kulang ang personahe.

Walay lain nga maka-atiman sa mga manganak, magpa-caesarian, ug magpa-prenatal sanglit isa lamang ka buok OB-Gyne doctor ang mag-duty kada adlaw.

Dili lang ang OB-Gyne section sa maong ospital nga dunay tag – usa ka doctor ang mag-duty kada adlaw kondi halos tanang section sama sa Surgery, Medicine, ug daghan pang uban gikan sa adlaw’ng Lunes hangtod Bernes.

Sa inisyal nga pagpanubay ning mantalaan ngadto sa Department of Health (DOH) Caraga, gipahayag ni Assistant Regional Director Dr. Cesar Cassion nga ang maong tambalanan, anaa sa level 2 nga kategoriya nga nagpasabot, daghang doctor ang mag-duty matag adlaw sa OB-Gyne Section, Medicine, Surgery, ug uban pang section sa tumong nga mahatag ang de kalidad nga serbisyo ngadto sa mga pasyente.

Apan sa aktwal nga operisyon sa maong ospital, wala kini nasibo sa level 2 nga kategoriya.