Thursday, November 12, 2015

Populasyon sa City Jail, Nisulbong

Ni Alex Mapoy
BUTUAN CITY – Gikomperma sa kadumalahan sa Butuan City Jail nga paspas ang pagsaka sa ihap sa mga piniriso ning tuiga.

Sumala ni Jail Officer 1 Psychie B. Macagaan, ang Inmates Welfare and Development Officer and Community Relations Service Officer sa maong pasilidad, nisaka og halos 10 hangtod 20 porsyento ang ihap sa mga piniriso.

Dugang ni Macagaan, ang nakalabay’ng tuig nga ihap sa mga piniriso, niduwal lamang sa 500 hangtod 600, apan karon, kapin na sa 700 ka buok ang populasyon sa pasilidad.

“Medyo paspas ta karon nga tuig. Seguro from previous years, dunay 10 – 20 percent out ana nga population. Last year, we only have 500 – 600, pero karon nga tuig, naa na ta sa 700 kapin,” pagkomperma ni Macagaan.

Gitin-aw usab sa opisyal nga kasagaran sa mga piniriso nalambigit sa pagpayuhot sa gidiling drugas diin uban kanila ang sulod-gawas na sa prisohan sanglit human mapriso, suble na usab kining mapriso tungod sa paghimo sa samang kalapasan.

Bunga sa pagsulbong sa ihap sa mga binilanggo, mas nanginahanglan ang maong pasilidad og dugang puwersa aron motabang pagbantay sa mga nahisgotan.

Daan nang naghangyo ang liderato sa maong pasilidad sumala pa sa opisyal ngadto sa rehiyonal nga buhatan sa Bureau of Jail Management and Penology (BJMP) Caraga nga hatagan sila og dugang personahe.

No comments:

Post a Comment