Seafarer Nanghawod sa Agrikultura

Ni Alex Mapoy

BUTUAN CITY – Garbo sa rehiyon sa Caraga human nanghawod ang usa ka Caraganon seafarer human gisudlan ang pagpamuhi og kahayopan.

Sa gihimong DA Gawad Saka Search nga gipahigayon sa Philippine International Convention Center, siyudad sa Pasay adtong Desembre 9, 2015, napili ug nadeklarang mananaug isip 2015 National Gawad Saka Outstanding Small Animal Raiser sa tibuok nasod si Joel S. Callano, usa ka seafarer, residente sa Sitio Matin-aw, Poblacion Tagbina, Surigao del Sur.

Gikabutyag ni DA Caraga Information Officer II Rhea Abao, gawas sa maong pasidungog, nadawat usab ni Callano ang presidential citation, presidential trophy, ug cash balor P200,000.

Nidaug si Callano sa maong kompetisyon human nagmalamposon ang pagpamuhi niini og kahayopan sa nasangpit nga lungsod.

Nagmalamposon si Callano sa pagpamuhi og kahayopan tungod sa tabang sa teknolohiya subay sa interbensyon nga gihimo sa rehiyonal nga buhatan sa agrikultura, Agricultural Training Institute (ATI) Caraga, uban sa pag-abag sa Provincial Agriculture Office - Surigao del Sur.

Ang 2015 Gawad Saka Search usa ka tinuig nga kalihokan sa Department of Agriculture (DA) uban sa pag-abag sa sangang buhatan sa goberno, non-government organizations, ug pribadong sector.

Tumong niini nga mahatagan sa pag-ila ang mga mag-uuma, fisherfolks, ug grupo sa katawhan kinsa nakahatag og dakong kontribusyon sa pagpalambo sa agrikultura sa tibuok nasod ug nagsilbing inspirasyon sa Pilipinong mag-uuma.