12,000 Estudyante, Nakaundang

Ni Alex Mapoy

BUTUAN CITY – Daghang kabataang Butuanon ang wala nakapadayon sa pagtungha tungod sa kapit-os sa kahimtang sa pamuyo sa ginikanan.

Sa datos sa Department of Education (DepEd) Butuan City Division, mokabat sa 12,809 ka buok mga bata (Out of School Youth) ang wala makatungha sa School Year 2015 – 2016 samtang 56,086 lamang ka buok estudyante ang nagtungha sa elementarya ug 24,699 usab sa sekondarya.

Alayon niini, mihimo og inisyatiba ang dibisyon aron bisan wala nagtungha sa elementarya ug sekondarya ang mga nahisgotan, gihanyag ang Alternative Learning System (ALS) Program sa ingon makakuha kini og skills nga magamit sa panarbaho.

Subay niini, mihanyag ang dibisyon og Alternative Learning System (ALS) Program aron bisan wala nakapadayon sa pormal nga edukasyon ang naasoy’ng kabataan, makabaton gihapon kini og skills nga magamit isip panginabuhian hinungdan nga mokabat sa 6,872 ka mga kabataan ang nikuha niini.

Luyo pa man sa kalinghod sa edad, sayo nga nasabak ang mga nahisgotan sa gimbuhaton sa panimay sama sa pag-asikaso sa mga lihokon sulod sa panimay – pag-atiman sa mga manghod, pagpanglimpiyo sa pinuy-anan.

Walay mahimo ang naasoy’ng kabataan kondi ang pagdawat sa kamatuoran nga sila dili makapadayon pagtungha sa elementarya o kaha sekondarya bisan supak sa ilang kabubut-on sanglit kabus ang ilang ginikanan.

Pipila usab kanila ang ni-aplay na lamang pagkatindera, katabang, o kaha tighugas sa plato sa pipila ka mga karenderia ning siyudad bugti sa ubos kaayo nga sweldo.