Thursday, August 20, 2015

Water Source, Gipailawom sa Maintenance


Ni Alex Mapoy
BCWD Senior Public Relations Officer
Ramil S. Barquin
BUTUAN CITY – Upat ka oras nga gipailawom sa maintenance ang tinubdan sa tubig sa Butuan City Water District (BCWD) kagahapong adlawa.

Nagsugod ang maong maintenance sa Sitio Iyao, Brgy. Anticala sakop ning siyudad, ala-1:00 hangtod alas-4:00 sa hapon.

Subay niini, nasinatian sa tanang konsumidor ang hinay nga agas sa tubig samtang ang ubang dapit ang walay agas.

Butyag ni BCWD Senior Public Relations Officer Ramil S. Barquin, tibuok service area ang na apektohan sa maong aktibidad sanglit ang maintenance didto gihimo sa tinubdan sa tubig.

Dugang ni Barquin, pipila ka mga dapit ang nakasinati sa hinay nga pressure, apan kadtong nahimutang sa tumoy nga bahin sa service coverage ang nakasinati sa pagkawala sa suplay.

“BCWD ADVISORY (Aug. 20, 2015; 10:45): Entire service area will experience low pressure while end points of the system may be waterless today, from 1:00pm to 4:00pm, due to maintenance activity at the water source in Iyao, Anticala,” mensahe ni Barquin.

Subay niini, nanghinaut ang opisyal nga nasabtan sa tanang konsumidor ang maong sitwasyon sanglit alang ra man usab kini sa kaayohan sa tanan.

Ang maintenance gihimo sanglit hangtod karon, dili pa matilawan ang serbisyo sa Taguibo Aquatech Solutions Company (TASC) gumikan kay padayon pa ang gihimong construction sa Impounding Weir sa tinubdan sa tubig.

Una nang gipasalig sa TASC ug sa water district nga sa Disyembre ning tuiga, matilawan na ang serbisyo sa maong proyekto.

No comments:

Post a Comment