Sundalo Gikantiyawan sa Rebelde; 11 – 0 Patay

Ni Alex Mapoy

Courtesy of National Democratic Front - Philippines (NDFP)

BUTUAN CITY – Gikantiyawan sa New People’s Army - North Central Mindanao Region (NPA-NCMR) ang 4th Infantry Division, Philippine Army human nalupig matod pa sa pito ka operisyon diin napatyan kini og 11 ka buok, daghan ang angol samtang sa ilahang habig ang matod pa, zero sa unang semana ning kasamtangang bulan.

Ang maong kantiyaw gihimo ni Ka Allan Juanito, tigpamaba sa NPA-NCMR human unang gibida ang 21 ka mga pagpangataki nga gihimo sulod sa mga bulan sa Hunyo ug Hulyo ning tuiga.

Sa sulat ni Ka Juanito, bisan matod pa daghan ang ihap sa tropa sa 4^th Infantry Division Philippine Army, apan nalupig matod pa kini sa gamay nga ihap sa mga rebelde.

Dugang ni Ka Juanito, tulo ka mga Sub-regional Commands sa NPA-NCMR ang nihimo sa nasangpit nga operisyon nga gikamatay sa pipila ka mga kaaway dihang kini ilang gikasangka.

“Three Sub-regional Commands of the New People’s Army in North Central Mindanao Region boldly faced the vigorous combat operations of the 4th Infantry Division in the adjoining provinces of Bukidnon, Misamis Oriental and Agusandel Norte. Eleven were killed and many got wounded from among the reactionary troops after seven clashes ensued in the first week of August 2015,” pasiatab ni Ka Juanito.

Gikomperma ni Ka Juanito, ang isa ka yunit sa South Central Bukidnon (NPA-SCB) Sub-regional Command maoy ni-ataki sa tropa sa goberno partikular na sa 8th Infantry Battalion ug Division Reconnaissance Company (DRC) sa kasundalohan didto sa Brgy. Indalasa, Malaybalay City, Bukidnon dihang nagpahigayon og pagpatrolya ang mga nahisgotan nga nagresulta sa matod pa, kamatayon sa tulo (3) ug ni-angol sa lima (5) ka mga sakop sa militar adtong Agosto 6.

Isa ka yunit sa Eastern Misamis Oriental-Northeastern Bukidnon (NPA-EMONEB) Sub-regional Command maoy gika-engkwentro sa tropa sa 1st Special Forces Company ug mga CAFGU sa Brgy. Farmbugas, Claveria, Misamis Oriental nga nagresulta sa kamatayon sa isa ka CAFGU ug ni-angol sa isa ka sundawo adtong Agosto 8 sa buntag.

Duha ka hugna nga pagpangataki ang gihimo sa yunit sa NPA-SCB batok na sa tropa sa 8th Infantry Battalion ug DRC sa Brgy. Indalasa, dakbayan sa Malaybalay. Tulo ka sundalo ang napatay sa sniper sa mga rebelde ug daghan matod pa ang na angol sa tropa sa kagamhanan. Lain matod pang duha ka sundalo ang napatay sa rebelde pagkahapon nga pagpangataki sa samang adlaw. Napugos matod pa ang militar pagamit og kanyon ingon man helicopter sa ingon makuha ang patay’ng lawas sa tropa sa goberno.

Sa samang adlaw, gi-harrass sa isa ka yunit sa Western Agusan Norte-Agusan Sur (NPA-WANAS) Sub-regional Command ang tropa sa 29^th Infantry Battalion dihang nagpahigayon kini og pagpatrolya sa Sitio Afga, Brgy. Olave, Buenavista, Agusan del Norte nga gikamatay matod pa sa duha ka sundalo ug ubay-ubay ang samaron.

Aksidenteng naka-engkwentro sa mga rebelde ang tropa sa 8^th Infantry Battalion Philippine Army sa Sitio Bendum, Busdi, siyudad sa Malaybalay diin swerte na lamang nga walay kinabuhi ang nakalas adtong Agosto 9.

Kadlawon sa Agosto 10, gi-ataki sa mga rebelde ang tropa sa kagamhanan sa Sitio Magawa, Bolunay, Impasug-ong, apan walay gikataho nga dunay kinabuhi nga nakalas.

Sa pito ka mga pagpangataki, wala gikomperma sa mga rebelde nga napatyan ang ilang habig o kaha dunay na angol.