5 Ronda Gihimo, 6 Dakpan

Ni Alex Mapoy

Drugas ug paraphernalia nga maoy nakapalipay sa mga dinakpang drug pushers/users sa higayon sila mo suyop, apan mao ra usay naghatod kanila sa bilanggoan. Photo courtesy of PRO 13

BUNAWAN, Agusan del Sur – Unom ka mga gituohang drug pushers/users ang nasikop sa hiniusang puwersa sa awtoridad subay sa gihimong lima ka hugna nga pagpangronda sa managlahing purok sa Barangay San Teodoro, lungsod sa Bunawan sakop sa naasoy’ng probensya.

Sa impormasyon ni PSupt. Martin M. Gamba, tigpamaba sa Police Regional Office (PRO) 13, unang ronda gihimo sa panimay ni Russel Moraña Puspus alias Dods Puspus, 28 anyos, ulitawo, walay trabaho, residente sa Purok 3 sa nahisgotang barangay.

Nakompiska sa awtoridad sulod sa panimay ni Puspus ang 6 ka sachets sa suspected shabu nga dunay timbang nga 0.7227 gramos nga dunay market value nga P10,000 ug mga drug paraphernalia.

Atol sa operisyon, na abtan sa kapulisan nga atua sulod sa panimay ni Puspus sila Van Stephen Salvado Puspus, 23 anyos, ulitawo; Joseph Dagondon Puspus, 54 anyos, ulitawo; ug Raul Dagondon Puspus, 53 anyos, minyo pulos nanimuyo sa naasoy’ng dapit kinsa lakip nga gi-aresto.

Ikaduhang ronda gihimo sa panimay ni Erick Lara Barrios, 24 anyos, minyo, walay trabaho, residente sa maong dapit kinsa gisikop sa awtoridad sulod sa gipanag-iyahang panimalay.

Nakuha sulod sa pinuy-anan ni Barrios ang 3 ka sachets sa suspected shabu nga dunay gibug-aton nga 0.1971 gramos nga dunay market value nga P3,000 lakip ang 3 ka aluminum foils.

Sa panimay usab ni Lorenzo Monico Corloncito Asuncion, 44 anyos, ulitawo, walay trabaho, nakuha sa kapulisan ang 3 ka sachets sa suspected shabu nga dunay timbang nga 0.1971 gramos nga dunay market value nga P3,000 lakip ang mga drug paraphernalia.

Atol sa ronda, wala nadakpan si Asuncion sanglit wala kini na abtan sa kapulisan sulod sa gipuy-an.

Kataposang ronda gihimo sa panimay ni Noli Noel Araneta alias Dodong, 37 anyos, minyo, walay trabaho, residente sa Purok Bliss sakop sa nasangpit nga barangay.

Nakuha sa mga awtoridad ang 13 ka sachets sa suspected shabu nga dunay kinatibuk-ang timbang nga 0.8541 gramos nga dunay market value nga P13,000 lakip ang mga drug paraphernalia.

Gihimo ang naasoy’ng pagpangronda subay sa gipagawas nga search warrant sa sala ni Kimal M. Salacop, Presiding Judge sa Regional Trial Court, Branch 6, Patin-ay, Prosperidad, Agusan del Sur adtong Agosto 20 ning tuiga.

Ang nahisgotang kalihokan kabahin kini sa gipakusgan nga kampanya sa kapulisan ning rehiyon – ang Oplan Lambat Sibat kansang operisyon naglangkob sa Bunawan Municipal Police Station; Provincial Anti-Illegal Drugs Special Operation Task Group (PAIDSOTG); Agusan del Sur Provincial Public Safety Company (ADS PPSC); ug 133rd Regional Public Safety Company.

Kasamtangang gitanggong ang mga dinakpan sa Bunawan MPS aron patubagon sa salaud nga nahimo.