Tuesday, August 25, 2015

Caraganon Giawhag Pag-undang sa Panigarilyo

Ni Alex Mapoy
Angayang putlon ang bisyo sa panigarilyo aron dili kini magbasol sa kaulahian, awhag ni DOH Caraga RD Dr. Jose Llacuna, Jr.
BUTUAN CITY – Peligroso sa panglawas sa tawo ang bisyo sa pagpanigarilyo hinungdan nga angay lamang kining undangon sa mga nagbisyo niini.

Sumala ni Department of Health (DOH) Caraga Regional Director Dr. Jose Llacuna, Jr. walay ikahatag nga kaayohan ang bisyo sa panigarilyo ug labaw sa tanan, daghan ang madamay labi na niadtong makahanggab sa aso sa sigarilyo.

Gi-angkon ni Dr. Llacuna atubangan sa media nga nanigarilyo usab siya niadto, apan dihang iyang naamgohan nga wala kini ikahatag nga kaayohan sa lawas, iya kining giputol nga matanga sa bisyo.

Alang kaniya, iyang gibasolan ang pagpakabuang sa maong bisyo ug nibati usab kini og kaluoy niadtong mga tawo nga nakahanggab sa aso sa sigarilyo nga iyang gibuga.

Hisayran ang sigarilyo gisagolan sa mga makahilong kemikal sama sa nicotine – isa ka matang sa kemikal diin kutob sa makahanggab niini, mahimong ma-adik sa sigarilyo, hydrogen cyanide – klase sa kemikal nga gisagol paghimo og bomba ug daghan pang uban.

Sa pagtuon, mokabat sa 400 ka mga klaseng makahilo nga kemikal ang gisambog sa sigarilyo hinungdan nga kadtong nagpakabuang sa maong bisyo, normal lamang nga makabaton kini sa sakit nga kanser sa baga, baba, tutunlan, pantog, tiyan, matris, o kaha sa bato.

Gawas sa kanser, mahimo usab nga masakit og Tuberculosis (TB) ang mga nagbisyo niini ingon man ang mga nakahanggab sa aso.

Nigawas usab sa pagtuon nga napulo ka mga Pilipino ang mamatay kada oras tungod sa sigarilyo.

No comments:

Post a Comment