SUCs’ Budget Decrease, Dili Tinuod - CHED

Ni Alex Mapoy

BUTUAN CITY – Gipanghimakak sa kadagkoan sa Commission on Higher Education (CHED) ang alegasyon nga gipaubsan sa gobernong Aquino ang alokasyon alang sa State Universities and Colleges (SUCs).

Dumduman nga atol sa Kontra SONA ni Vice – President Jejomar Binay, gipamugos sa nahisgotan nga ang budget sa SUCs adtong 2014, anaa lamang sa P35.93 bilyones ug sa samang tuig, ang University of the Philippines (UP) nakadawat lamang og P9.37 bilyones samtang P1.97 bilyon sa Mindanao State University (MSU).

Sumala ni CHED Caraga Chief Education Program Specialist Engr. Ramil A. Sanchez, gidiga ni CHED Chairperson Patricia B. Licuanan, Ph.D. ang datos nga mokabat sa P22.03 bilyones ang gigahin sa gobernong Aquino adtong tuig 2011 samtang ning tuiga 2015, mokabat sa P42.28 bilyones ang gigahin sa kasamtangang administrasyon alang sa SUCs.

Apan gi-angkon ni Dr. Licuanan nga tinuod dunay pag-ubos sa UP System budget nga niabot sa P156 milyones adtong 2014, ang UP usab maoy nakadawat sa pinakadako nga Capital Outlay (CO) allocation adtong 2013 nga niabot sa P1.45 bilyon. Ning tuiga, ang budget sa UP maoy pinakadako nga niabot sa P13.14 bilyones nga dunay CO nga P4.6 bilyones.

“While it is true that there was a slight decrease in the UP System budget of PhP156 million in 2014, the UP System received the biggest Capital Outlay (CO) allocation in 2013 of PhP1.45 billion. Further, UP’s 2015 budget is at its highest so far at PhP13.14 billion with a CO of PhP4.6 billion,” pag-angkon ni Dr. Licuanan.

Samtang ang budget sa MSU sa 2014, niubos ngadto sa P632.66 milyones kon itandi sa 2013 nga CO nga niabot sa P868.59 milyones.

Gitin-aw usab sa opisyal nga walay kamatuoran ang pagkibhang sa budgets sa Cavite State University ug Isabela State University sanglit ang tinuod, ang nahisgutan nga mga institusyon padayong nisaka gikan sa 2011 hangtod ning tuiga 2015. Nagtimaan kini nga sulod sa 5 ka tuig, ang Cavite State University nisaka og 83.48% gikan sa P192.69 milyones sa 2011 ngadto sa P353.55 milyones ning tuiga samtang sa Isabela State University, ang budget nisaka og 55.05% gikan sa P369.29 milyones sa 2011 ngadto sa P572.75 milyones ning tuiga.