NBP College, Gibasura

Ni Alex Mapoy

Luyo sa maayong katuyoan sa LGU Buenavista pagtukod sa New Polytechnic College, gibasura sa Sangguniang Panlalawigan sa Agusan del Norte ang ordinansa nga naghatag legalidad sa katukuran niini tungod sa nakitang inconsistency. 

AGUSAN DEL NORTE – Gibasura sa 16^th Sangguniang Panlalawigan sa Agusan del Norte ang Municipal Ordinance No. 13 – 2015 nga napalabang sa Sangguniang Bayan sa Buenavista atol sa ika-101 ka hugna sa Regular Session sa SP Session Hall, Capitol Compound sakop sa siyudad sa Butuan adtong Agosto 10, 2015.

Hisayran ang maong ordinansa maoy maghatag legalidad sa pagatukuron nga tunghaan sa kolehiyo sa maong lungsod nga tawgon sa pangalang, New Polytechnic College (NPC).

Napalabang ang maong ordinansa sa hawanan sa Sangguniang Bayan sa Buenavista sa nakalabay’ng Hulyo 2 ning tuiga.

Tumong sa katukoran mao ang paghatag kahigayonan sa mga estudyante sa nasangpit nga lungsod labi na kadtong mga anak sa kabus nga pamilya nga dunay kasibot nga mo padayon pagtungha sa kolehiyo, apan ang mga ginikanan, walay kakapas pag-abaga sa galastohan.

Apan human giduso sa Sangguniang Bayan sa Buenavista ang maong ordinansa ngadto sa Sangguniang Panlalawigan sa probensya, nakita ang mga buslot sa nasangpit nga ordinansa subay sa gihimo nga makuting pagrebyu sa mga magbabalaud ning probensya hinungdan kini nahukman nga ibasura.

Ilawom sa Sanggunian Resolution No. 218 – 2015 nga gipangamahanan ni Board Member Rodulfo A. Pitogo ug nagsilbing co-author sila Board Member Rey J. Jamboy ug Board Member Virgilio R. Escasinas, Jr.  gideklarang inbalido ang Municipal Ordinance No. 13 – 2015 nga giilang, “An Ordinance Establishing a College Institution in the Municipality of Buenavista Agusan del Norte to be Known as New Polytechnic College.”

Nalatid usab niini nga ordinansa nga gitambagan sa rehiyonal nga buhatan sa Commission on Higher Education (CHED)pinaagi sa ilang representante nga amendahan o usbon ang pipila ka mga probisyones sa nasangpit nga Municipal Ordinance.

Pabor usab ang representante sa CHED Caraga sa baruganan sa pipila ka membro sa komitiba nga pakyas ang LGU Buenavista sa pagsunod sa procedural requirements nga nakalatid sa CMO.

Gitin-aw usab sa representante sa komisyon nga wala nakasumite ang LGU Buenavista sa gikinahanglan nga mga dokumento sa rehiyonal nga buhatan.

“WHEREAS, the CHED representative, however, agreed with the contentions of other members of the committee that the LGU of Buenavista failed to follow the procedural requirements pursuant to the aforecited CHED Memorandum Order.”

Subay niini, gibasura ang maong ordinansa sa munisipyo tungod sa inconsistency sa pagsunod sa nagtunhay nga CHED Memorandum Order (CMO) No. 32, series of 2006, CMO No. 04, series of 2007, ug  DILG Memo Circular No. 2009 – 67.

“BE IT RESOLVED, by the Sangguniang Panlalawigan of Agusan del Norte, in session assembled, to declare Invalid Municipal Ordinance No. 13 – 2015 from the Sangguniang Bayan Buenavista, this Province, “An Ordinance Establishing a College Institution in the Municipality of Buenavista, Agusan del Norte to be Known as a New Polytechnic College” for being inconsistent with existing CMO No. 32, series of 2006, CMO No. 04, series of 2007 and DILG Memo Circular No. 2009 – 67.”