Wednesday, January 6, 2016

Teenage Pregnancy, Druga Gibasol

Ni Alex Mapoy 
BUTUAN CITY – Gitumbok sa Population Commission (PopCom) Caraga nga usa ang druga sa mga hinungdan kon nganong mitaas pag-ayo ang teenage pregnancy sa rehiyon sa Caraga.

Kon basehan ang resulta sa 2013 Young Adult Fertility and Sexuality Study nga gihimo sa University of the Philippines Population Institute (UPPI), ang ihap sa kababayen-an nga sayong nagsabak nipilo ngadto sa makaupat.

Sumala ni PopCom Caraga Information Officer II Angelita Antonio, gikan sa 3.5% sa tuig 2002 sa kababayen-an nga sayong nagsabak, nipilo kini sa makaupat og milansang sa 13.0% sa tuig 2013.

Ang maong edad dili pa angayan nga mahimong inahan sanglit kon physical ang tan-awon, dili pa andam ang lawas nga magsabak.

Kasagaran sa nalambigit sa teenage pregnancy mao kadtong kababayen-an nga nag-edad 15 hangtod 19 anyos.

Dugang ni Antonio, usa sa mga hinungdan nganong sayo nga nahimong inahan ang mga nahisgotan tungod sa impluwensiya sa druga.

Kinaiya sa kabataan, saysay sa opisyal mao ang pag-apil apil sa grupo ug dili malikayan nga aron makasabay sa grupo, kon mag-druga ang kaubanan, mag-druga usab kini.

Sa higayon nga impluwensiyado na sa druga matod pa sa opisyal, ang grupo mag-pares pares na dayon ug sa walay paglantaw unsay ilang dangatan, maghilawas luyo sa kalinghod sa ilang edad.

Alang sa opisyal, mapugngan ang maong hitabo kon ang mahatagan lamang sa ginikanan og igong panahon ang ilang mga anak ug mahatagan sa saktong giya aron dili kini malakip sa listahan sa kabataan nga sayong nahimo nga inahan.

No comments:

Post a Comment