Kinaiyahan Panalipdan; Katawhan, Gidasig sa Obispo

Ni Alex Mapoy

BUTUAN CITY – Gidasig sa Obispado sa Butuan ang tanang katawhan nga panalipdan ang kinaiyahan ug angayan nga suportahan ang mensahe ni Pope Francis sa ikaduhang encyclical letter nga Laudato Si nga nagpasabot Care for our home place, Mother Earth.

Gikabutyag ni Butuan Bishop ug CCPD Convenor Most Rev. Juan de Dios Pueblos, angay hangpon ug suportahan sa katawhan ang panawagan sa Santo Papa sa ingon mahatagan og tino nga sulbad ang kasamtangang kahimtang sa kalibotan diin nagkadaiyang kalamidad ang nasinati.

Nanghinaut si Pueblos nga ang kasamtangang “climate scenario” dili mo grabe dungan sa pagdasig nga ipadayon ang pag-ampo aron mapakusog ang relasyon tali sa kaugalingon ug sa Labaw’ng Makagagahom.

Sa maong paagi, pamugos sa opisyal nga mahimong mahigugmaon ang katawhan sa kinaiyahan ug niana, maglikay na kini sa pagpasipala.

Hisayran ang nasinatian nga Climate Change sa kalibotan bunga kini sa pagpasagad ug pag-abuso sa katawhan ngadto sa kinaiyahan.