Liboang Caraganons, Walay Trabaho

Ni Alex Mapoy

BUTUAN CITY – Liboan ka mga Caraganons ang walay trabaho hinungdan nga kadaghanan kanila ang ni-abroad tungod sa kawalay igong oportunidad nga kasudlan og trabaho ning rehiyon.

Pinasikad sa January 2015 data sa Philippine Statistics Authority (PSA) Caraga, ang rehiyon sa Caraga dunay 1,777,000 ka buok indibidwal kinsa nag-edad 15 anyos pa taas kansang edad ang mahimo nang makatrabaho.

Sa kinatibuk-ang ihap, 93.5% katumbas sa 1,661,495  ang dunay trabaho; 23.9% katumbas sa 424,703 ang dunay trabaho, apan ang sweldo kulang pagtubag sa inadlaw’ng panginahanglan hinungdan nga sila nang sideline; ug 6.5% katumbas sa 115,505 ang walay trabaho sa tibuok rehiyon. 

Ang nahisgotang datos gi-base sa gihimong Labor Force Survey adtong Enero 2015 sa ahensya sa PSA.

Isip tubag sa kakulang sa trabaho, nakita sa National Economic Development Authority (NEDA) Caraga nga kon mapalambo ang transport services, agriculture, mining industry, forestry, ug tourism mas mo lig-on ang ekonomiya sa rehiyon ug mahatagan og trabaho kadtong nangita og trabaho ug taas nga sweldo aron makuhaan ang underemployment kinsang trabahante nikayod subra sa otso oras aron lamang matubag ang panginahanglan sa pamilya.