Rasyon sa Bakwit, Nagkagamay

Ni Alex Mapoy

Photo courtesy of Karapatan Caraga

SURIGAO DEL SUR – Kutob na lamang sa Nobembre 15 ang suporta nga mahatag sa probensyal nga panggamhanan sa Surigao del Sur ngadto sa mga bakwit.

Hisayran nga mokabat sa 3,000 kapin ka mga bakwit nga nagpasilong sa evacuation center sa nasangpit nga probensya.

Sa impormasyon sa Philippine Information Agency (PIA) Caraga, gipahayag matod pa ni Surigao del Sur Gov Johnny Pimentel, duha na lamang ka semana ang kaya sa probensya pag-ayuda sa pagkaon sa mga bakwit.

Dugang ni Gov. Pimentel, human unya sa Nobembre 15, wala na silay mahatag pa nga pagkaon ngadto sa mga nahisgotan.

Photo courtesy of Alex Baluyut

Bisan pa man, gihatagan pa gihapon og paglaum sa gobernador ang mga bakwit nga paningkamotan nila nga matabangan ang mga bakwit, apan ang maong tabang ang dunay kataposan tungod sa kadaghan sa pakan-on.

“Surigao del Sur Gov Johnny Pimentel pointed out that the food provisions for the 3,000 evacuees from the provincial government will only last for about two weeks. "So until November 15, we can still afford to feed them... after that we have no more.” However, the provincial chief executive expressed optimism his administration could still hold on,” impormasyon sa PIA Caraga.

Subay niini, namiligro ang tanang bakwit sa probensya nga magutman sa umaabot nga mga adlaw hinungdan nga nanawagan na ang mga lumad nga tabangan sila nga makabalik sa labing dali nga panahon sa ilang dapit pinaagi sa pagdakop sa mga kriminal.