NPA Sulod – Gawas sa Butuan

Ni Alex Mapoy

Random checkpoint gihimo batok dautang elemento, apan kini nalutsan

BUTUAN CITY – Gi-angkon sa kadumalahan sa Police Regional Office (PRO) 13 nga sulod – gawas lamang ang mga sakop sa New Peoples Army (NPA) sa dakbayan.

Una nang nigawas ang impormasyon nga sulod – gawas lamang ning siyudad ang mga rebelde taliwala pa man sa hugot nga pagbantay sa awtoridad batok sa maong grupo.

Sumala ni PRO 13 Spokesperson PSupt. Martin Gamba, dugay na nga panahon nga magsulod-gawas ning siyudad ang mga rebelde.

Taliwala pa man sa maong kahimtang, wala dakpa sa awtoridad ang mga nahisgotan sanglit mo sulod o kaha mo gawas ang mga nahisgotan nga pulos nakasibilyan.

“Dugay naman na. Sige naman na sila sulod – gawas dinhe. Apan, dili armado,” pag-angkon ni Gamba.

Bisan pa man, padayon ang gihimong monitoring sa kapulisan aron kon mohimo og dautang buhat ang mga nahisgotan, ila gilayon kining mapugngan.

Padayon usab nga nakig-alayon ang kapulisan sa lokal nga kagamhanan ingon man sa kabaranggayan ug sa publiko sa ingon matabangan kini pagbantay ug pagpugong batok sa dautang elemento.