Kangitngit sa Butuan, Gireklamo

Ni Alex Mapoy

BUTUAN CITY – Mireklamo na ang pipila ka mga motorista human nasinati ang kangitngit sa pipila ka mga dalan sa siyudad sa Butuan.

Hisayran nga pipila na ka gabii nga walay suga ang South Montilla Boulevard labi na sugod sa South Montilla Bridge padulong sa Rosewood Area ug pipila usab ka mga suga sa dalang Montilla, ang dugay na nga wala nagsiga, bisan pa sa sentrong bahin ning siyudad, masinati usab ang kangitngit.

Gawas sa Montilla Boulevard, pipila usab ka mga suga sa J.C. Aquino Avenue ang wala nisiga kansang problema ang dugay na, apan, gipasagdan lamang sa lokal nga kagamhanan.

Sumala ni alias Aldrin, nanag-iya og single motor, taga – Barangay San Vicente ning siyudad, magpanagana matod pa siya mo suroy sa siyudad sanglit ngitngit kaayo agian ang Rosewood area padulong sa tulay duol sa rehiyonal nga buhatan sa Commission on Audit (COA) Caraga panahon sa gabii.

Dugang ni Aldrin, gikan usab sa COA Caraga padulong sa sentrong siyudad, ngitngit gihapon kini agian sanglit pipila na lamang ka suga ang nagsiga.

Alang sa nauwahi, importante ang suga sa kalsada aron magpanagana ang mga rebelde, tulisan o dautang elemento paghimo og kremin sanglit hayag ug daghan ang makakita, apan kon dili hatagan og solusyon ang maong kangitngit sa siyudad, sama ra matod pa nga gihatagan og kahigayonan sa kagamhanang lokal ang mga nahisgotan paghimo og kremin.

Si alias Larry, usa ka estudyante nga nanag-iya og motorsiklo, taga – Buenavista, Agusan del Norte, nadismaya sa kangitngit sa pipila ka bahin sa kalsada ning siyudad sanglit duol matod pa sa peligro ang iyang kinabuhi.

Daling nakompara sa nauwahi nga mas luwas, matod pa suroyan panahon sa gabii ang lungsod sa Buenavista labi na sa sentrong bahin sanglit hayag ang kadalanan sukwahi sa siyudad sa Butuan nga ngitngit ang kalsada sanglit pipila lamang ka suga ang nagsiga.

Pamugos sa mga nahisgotan, nahibaw-an nang daan sa hingtungdahang ahensya o sa kagamhanang lokal nga dili lifetime ang suga nga gitaud hinungdan angay unta matod pa dunay daang reserba nga suga aron sa higayon nga mapunder, mailisan gilayon.