Sementeryo Estriktong Gibantayan

Ni Alex Mapoy

Butuan City Police Station 1 Station Commander PSI Nefre Telewik Acaso uban ang mga sakop

BUTUAN CITY – Estriktong gidid-an ang mga managkot sa nagkadaiyang lubong sa nagkadaiyang sementeryo ang pagdala sa mga butang gidili sulod sa sam-ang.

Taliwala pa man sa maong patakaran, duna pa gihapoy pipila ka mga indibidwal ang nisuway pagpalusot og sundang ingon man gabas sulod sa sementeryo.

Gikabutyag ni Butuan City Police Station 1 Station Commander PSI Nefre Telewik Acaso, swerte na lamang nga dali nilang nabantayan kadtong mga indibidwal nga nagdala og sundang ingon man gabas pa sulod sa sementeryo hinungdan ila kining gikompiska.

Dugang ni Acaso, kadtong mga indibidwal nga ilang nakuhaan sa maong mga gamit, ang ila usab kining gipasabot pag-ayo nga kini gidili sa sulod sa ingon dili usab kini masuko.

Pasabot sa opisyal, gidili ang pagdala og sundang sa sulod o bisan bino sanglit gilikayan niini nga dunay duguon nga hitabo sulod sa sementeryo tungod lamang sa maong hinagiban.

Gipanagan-an usab sa opisyal nga kon dunay matigayon nga panaglalis sulod sa sementeryo, walay magamit nga hinagiban ang duha ka habig sa ingon walay duguon nga mahitabo.

Sa kinatibuk-an, gipaneguro sa opisyal nga tanang managkot sa nagkadaiyang sementeryo ang ila kining bantayan aron luwas nga makapanagkot ang katawhan dungan sa pahimangno nga likayan ang pagdala sa mahait nga mga butang ingon man ilimnon lakip na usab sound system aron dili matugaw ang uban nga nag-ampo.