Pagpanagkot Gihimong Livelihood

Ni Alex Mapoy

 Senaryo atubangan sa dakong krus sulod sa sementeryo

BUTUAN CITY – Gihimo nang panginabuhian sa mga gagmay’ng negosyante ug indibidwal ang pagpanagkot sa magtutuong Katoliko sa nagkadaiyang sementeryo.

Gikabutyag ni Milagros Jaña, hingkod ang edad, residente sa Purok 1, Barangay Lapu-lapu sakop ning siyudad, bisan gisakyan sa pipila ang pagpanagkot sa mga magtutuong Katoliko sa ilang minahal sa kinabuhi, makonsidera pa gihapon niya kini nga maayo kaysa magpakilimos o kaha mangawat.

Dugang ni Jaña, gihagoan ug gipatuloan og singot sa mga nahisgotan ang paghatag sa serbisyo ngadto sa managkotay hinungdan nga makatarunganon lamang usab nga bugtian ang ilang kahago.

Negosyo gawas sa sementeryo

Pasabot sa nauwahi, bisan pa man nga daw gihimong panginabuhian ang maong adlaw sa mga Santos ug sa mga Minatay, apan, dili angayan hikalimtan sa tanang managkot nga gihimo kini aron handumon ang mga masakit ug malipayong panag-uban sa mga minahal sa kinabuhi niadtong buhi pa kini.

Alang kaniya, bisan atua na sa laing kalibutan ang pipila ka mga minahal sa kinabuhi, apan dili usab ikalimod nga kabahin pa gihapon sila sa atong kagahapon, karon, ug sa umaabot.

 Presyo sa kandila, nimahal. Managkutay, walay nahimo.

Hisayran nga sulod sa sam-ang, nagkadaiyang serbisyo ang gihanyag sama sa pagpanghinlo sa lubong, pagpintal sa pantiyon, paglakad sa hinaling kansa pagabayran sa hingtungdan nga mopahimulos sa maong serbisyo.

Sa gawas usab sa sementeryo, anaa ang nagkadaiyang klase sa kandila, bulak, ug pagkaon nga gibaligya sa mga nangiyawat nga mga negosyante.