Langyaw’ng Turista Gidid-an

Ni Alex Mapoy

BOI Caraga Acting Alien Control Officer Cesar Valdez

BUTUAN CITY – Hugot nga gidid-an sa Department of Justice (DOJ) ang tanang Foreign Tourists sa nagkadaiyang dapit sa nasod paglambigit sa sunod tuig nga piliay.

Alayon niini, nagpagawas si Justice Secretary Leila M. De Lima og kamandoan ngadto sa Bureau of Immigration (BOI) nga estriktong ipatuman ang maong mandato ug ipaseguro nga mapaabot ug mapatuman kini ngadto sa tanang rehiyonal nga buhatan sa ahensya.

Sumala ni BOI Caraga Acting Alien Control Officer Cesar Valdez, nakalatid sa maong mandato nga gidid-an ang tanang langyaw nga turista paglambigit sa bisan unsa mang klase sa kalihokan nga dunay kalabotan sa pulitika.

Giklaro ni Valdez, dili puwede mag-apil apil ang mga langyaw’ng turista sa pulitikanhong kalihokan sa nasod sama sa pag-uban sa pagpangampanya sa kandidato, political rally, political assembly, ug labaw na sa paghatag og ayudang pinansyal.

Pamugos sa opisyal, angayan nga dili kalimtan sa mga langyaw’nmg turista nga limitado ang ilang pagbansay sa kaugalingon nga pulitikanhong katungod samtang ania kini nag-istar sa nasod.

“Returned herewith is the Operations Order enjoining foreign tourists in the Philippines to observe the limitation on the exercise of their political rights during their stay in the Philippines, as approved and signed by the undersigned,” mandato ni De Lima.

Sa pagkutlo ning balita, wala pay nadawat ang rehiyonal nga buhatan nga dunay mga langyaw’ng turista ang nag-apil apil sa kalihokan sa pulitika labi na dinhe sa rehiyon.