Empleyado Mo Bakasyon, Sweldado?

Ni Alex Mapoy

NLRC Caraga Administrative Officer V Robert M. Aying

BUTUAN CITY – Giklaro sa National Labor Relations Commission (NLRC) nga dili tanang empleyado nga mo bakasyon, sweldado sa kompanya o kaha establisyemento sanglit dili pa kini puwedeng makapahimulos sa Service Incentive Leave (SIL).

Basi sa nakalatid sa Article 95 sa Labor Code of the Philippines nga gi-uloha’g Service Incentive Leave (SIL), bugtong makapahimulos niini nga benepisyo mao lamang kadtong empleyado nga regular ang estado sa panarbaho ug nakatrabaho sa dili mo minus, usa ka tuig.

Sumala ni NLRC Caraga Administrative Officer V Robert M. Aying, kadtong regular ug nakatrabaho na og usa ka tuig nga trabahante, mahimo niining mapahimuslan ang 5 ka adlaw nga SIL sulod sa isa ka tuig.

“Every employee who has rendered at least one (1) year of service is entitle to Service Incentive Leave (SIL) of five (5) days with pay.”

Dugang ni Aying, kon dunay kompanya nga naghatag og SIL ngadto sa ilang empleyado nga subra sa 5 ka adlaw, desisyon na kini sa management ug dako kining bentaha sa mga trabahante sanglit makabakasyon ang mga qualified employee nga magdawat og sweldo.

Kon dili man ugaling magamit sa trabahante ang SIL sulod nianang tuiga, puwede kining i-convert into cash sa hingtungdang empleyado.

Gitin-aw sa opisyal, kon ang empleyado nahimo nang regular, apan wala pa kaabot og usa ka tuig ang pagpanarbaho sa maong establisyemento o kompanya, dili kini puwede maka-avail sa SIL.

Labot niana, bisan regular na kini sa trabaho ug nilagpas og isa ka tuig ang pagpangimpleyo, puwede gihapon kini nga dili maka-avail sa maong benepisyo kon ang trabahante nagtrabaho sa usa ka kompanya o establisyemento nga ang ihap sa mga empleyado, wala nakaabot og napulo.

Nanghinaut na lamang ang opisyal nga masabtan kini pag-ayo sa tanang empleyado ingon man sa management aron walay interes ang ma-dehado.