Pulis Madisgrasya, Tabangan?

Ni Alex Mapoy

Pulis nagserbisyo sa katawhan, madisgrasya sa dalan,
walay tabang malauman. 

BUTUAN CITY - Gipasalig sa tigpamaba sa Police Regional Office (PRO) 13 nga ipaabot ngadto sa kadumalahan sa kapulisan ning rehiyon ang kabahin sa hisgutanan nga kon madisgrasya ang kaubanang pulis, unsay mahatag nga hinanaling ayuda sa rehiyonal nga buhatan.

Sumala ni PRO 13 Spokesperson PSupt. Martin Mercado Gamba, angayan nga hatagan nila kini og aksyon aron matabangan ang kaubanang pulis kon madisgrasya.

Gi-angkon ni PRO 13 Spokesperson PSupt. Martin Mercado Gamba, kon madisgrasya ang kaubanan niining pulis ON/OFF DUTY man, walay mahatag nga ayuda ang rehiyonal nga buhatan sama sa pinansyal nga aspeto ug kon duna man, personal na kini nga desisyon nga mo tunol sa pipila ka piso.

Nahimugso ang maong hisgutanan, human usa ka opisyal sa pulis ang nalambigit sa vehicular accident ug walay swerte, nakutluan pa sa hinulamang kinabuhi sa sayong bahin ning semanaha.

Ang gikasakit lamang sa kabanay sa biktima, nadisgrasya ang mahal niini sa kinabuhi atubangan sa Butuan Doctors Hospital, apan didto kini gidala sa pampublikong ospital sa Butuan Medical Center.

Pulis madisgrasya, walay tabang makuha.

Didto na lang sa pampublikong ospital gidala ang maong pulis gumikan sa kawalay igong salapi nga ikabayad sa pagpa-ospital.

Sumala ni PSupt. Gamba, sa nahitabo sa ilang kauban nga pulis, bugtong tabang nga nakuha ang gikan sa kaugalingong insurance ug ang salapi sa ka batch sa biktima nga nag-amot amot aron dunay kwarta nga ikahatag.

Sa maong sitwasyon, nasubo usab ang kadumalahan sa rehiyonal nga buhatan, apan ang maong hitabo nagsilbing wake-up call sa ilang kabahinan aron mo himo sa usa ka nilangkob nga lakang aron kon ugaling dunay madisgrasya niining kauban, matunulan gilayon kini og pinansyal nga ayuda sa kapulisan nga nadestino ning rehiyon.

Ni-angkon usab ang opisyal, wala pay pribadong ospital ning rehiyon nga nahimong ka partner sa buhatan o nakasabot nga mo sulod sa usa ka Memorandum of Agreement (MOA) kansang tuyo nga kon madisgrasya ang usa ka membro sa han-ay, awtomatiko kining dalhon sa maong ospital ug tanan nga gikinahanglang medikasyon, ihatag ug tabangan sa rehiyon ang balayrunon sa tambalanan.

Gitin-aw usab sa nahisgutan nga ang gitukod nga ospital sa mga pulis tapad sa Camp Rafael Rodriguez, ang wala kini igong kakapas paghimo sa mga major operations sanglit wala kini igong pasilidad.

Asoy pa sa opisyal, ang pagsulod og MOA tali sa pribadong ospital nahimo na kini ngadto sa kaulohan diin kon madisgrasya ang usa ka pulis, diretso kini dalhon sa nahimo niining partner nga ospital ug ang kabanay sa biktima, dili na ma-problema, apan dinhe sa rehiyon, wala pay sama niini nga kasabotan hangtod sa pagsulat ning balita.

Buy Bust Op Nagpositibo

Ni Alex Mapoy

Pagrekisa sa single motor sa suspetsado. Courtesy of
Buenavista Municipal Police Station

BUENAVISTA, Agusan del Norte – Signit sa kapulisan sa Buenavista Municipal Police Station ang 21 anyos nga ulitawo human gilusad sa kapulisan ang buy bust operation sa Purok 8 Brgy. Matabao sakop sa maong lungsod adtong Miyerkules sa gabii.

Naila ang suspetsado nga usa ka Reynald Mosende, nagpuyo sa nahisgutang dapit. 

Basi sa impormasyon nga gipaabot ni PSI Solomon E. Alemania, Jr., ang Officer-In-Charge sa nasangpit nga present, napalit sa ahente sa kapulisan ang  usa ka sachet sa suspected shabu kang Mosende sa gihimong operisyon. 

Mugshot ni Reynald Mosende. Courtesy of
Buenavista Municipal Police Station

Human nagpositibo, gisikop gilayon sa kapulisan ang suspetsado ug nakuha gikan sa posisyon sa nahisgutan ang mo sunod: usa ka yunit sa Honda Wave motorcycle color black nga dunay plaka numero 4113KE; usa ka yunit sa Cherry Mobile cell phone color black; usa ka P100 peso bill nga gigamit sa buy bust; lain pang usa ka P100 peso bill nga gigamit sa buy bust; usa ka sachet sa suspected shabu; ug daghan pang uban.

Kasamtangan nga gitanggong ang suspetsado sa karsel sa Buenavista Municipal Police Station ug gi-andam na ang kaso nga ipasaka batok sa nahisgutan.

Kasong kalapasan sa Republic Act (RA) 9165 o mas naila nga Comprehensive Dangerous Drug Act of 2002.

Sa gihimong pag-search ngadto sa responsable, nisaksi ang mga opisyales sa Brgy. Matabao sama nila Kagawad Ponciano B Candole Jr, Brgy. Secretary Edward M Rutz, representante sa Department of Justice (DOJ) nga si Noel D. Indonto, ug usa ka reporter sa RMN DXBC Butuan.

Lupin sa MisOr Dakpan sa Agusan

Ni Alex Mapoy

Loijen Saladas alias Lupin nadakpan sa Buenavista Agusan del Norte.
Courtesy of Buenavista Municipal Police Station

BUENAVISTA, Agusan del Norte –  Arestado sa kapulisan sa Buenavista Municipal Police Station (BMPS) ang usa ka kriminal sa Misamis Oriental human nasigpatan ang presensiya sa maong lungsod.

Naila ang akusado nga si Loijen Saladas alias Lupin, 27 anyos, ulitawo, walay trabaho, kasamtangang nanimuyo sa Sitio Afga, Brgy Olave, Buenavista sakop ning probensya.

Basi sa impormasyon ni Police Senior Inspector Solomon E. Alemania, Jr. ang kasamtangang Officer-In-Charge sa BMPS, nakit-an ang akusado nga nagsuroy-suroy sa Brgy. Matabao sakop sa Buenavista hinungdan nga dali kining gipaambakan sa sakop sa nahisgutan resulta sa pagkasikop.

Nasayran nga si Saladas, nakapatay sa Misamis Oriental ug napagawasan og warrant of arrest sa sala ni Judge Mirabiaus A. Undalok, presiding Judge sa Regional Trial Court, 10^th Judicial Region, Branch 43, nga nahimutang sa dakbayan sa Gingoog, adtong Enero 21 ning tuiga.

Walay piyansa nga girekomenda si Judge Undalok batok sa akusado.

Sa pagsulat ning balita, gipaslak ang akusado sa prisohan sa BMPS ug gihikay na ang gikinahanglang rekisitos aron dalhon ang nahisgutan sa korte nga nagpagawas og warrant of arrest kaniya.

Epektibong Serbisyo Gipasalig

Ni Alex Mapoy

OWWA Caraga Regional Director Samuel S. Madrid .

BUTUAN CITY – Gisaad sa bag-ong liderato sa Overseas Workers Welfare Administration (OWWA) Caraga nga itunol ang mas epektibong serbisyo ngadto sa mga kliyente.

Sumala ni OWWA Caraga Regional Director Samuel S. Madrid, kon unsay nasugdan ni kanhi OWWA Caraga OIC Regional Director Eduardo Bellido sa ahensya ning rehiyon, iya kining ipadayon.

Dugang ni Dir. Madrid, ilawom sa iyang liderato, mas iseguro ug i-asdang ang epektibong pagpangalagad ug paningkamotan nga mahimo ang kaakohan sa ahensya.

Tanang serbisyo, benepisyo, ingon man programa sa ahensya ang ipatuman ning rehiyon sa ingon matagamtaman kini sa tanang membro.

Prinsipyo sa opisyal, ang pagserbisyo nga kinasingkasing maoy labing importante ug magsilbing instrumento aron mahimong epektibo ug makahuloganon ang pagtunol sa serbisyo ngadto sa tanan niining kliyente.

“Ipagpatuloy yong mga objectives, visions and mission ng OWWA para mas lalong makatulong at ma-deliver natin more efficiently and effectively ang lahat na services, benefits, and programs,” tipik sa pasalig ni Dir. Madrid.

Nahisgutan usab sa opisyal nga ang pagserbisyo dinhe sa nasod ug sa gawas, ang walay kalahian sanglit kon hisgutan ang hagit sa trabaho, pareha lamang kining lisod labi na nga bag-o kini sa lugar nga nadestinohan.

Bugtong inspirasyon sa nahisgutan aron mahimong epektibo sa paghatag sa serbisyo mao ang kinasingkasing niining pagpangalagad sa tanan.

Kakulang sa Classrooms, Kibhangan – Fortun

Ni Alex Mapoy

BUTUAN CITY - Tungod sa nagkaduol nga full blast implementation sa K-12 full implementation sa Department of Education (DepEd), usa si Agusan del Norte First District Cong. Atty. Lawrence “Law” Fortun ang naghingusog nga makibhangan ang ihap sa “classroom deficiency” sulod niining tuiga.

Sumala ni District Constituency Office Public Information Officer Ian Sabado, serye nga pag-turnover sa bag-ong natukod nga mga lawak tunghaan  sa dakbayan sa Butuan ug sa lungsod sa Las Nieves Agusan del Norte ang gihimo ni Cong. Fortun sa nakalabay’ng mga bulan.

Dugang ni Sabado, gihimo kini sa kongresista isip suporta sa nagkaduol nga full blast implementation sa K-12 education system sa nasod.

Courtesy of Lawig Katawhan

Una nang namantala sa Official Gazette, sa kinatibuk-ang 7,914 ka mga public high schools, gi-rekognisa sa DepEd nga 5,020 niini, potensyal nga himuong Senior High Schools.

Ang maong ihap, kaya nga tunghaan sa 1.6 milyones hangtod 2.2 milyones ka mga estudyante. Samtang ang nahibilin nga 800-mil hangtod isa ka milyon ka mga magtutungha, lauman nga adto kini mo eskwela sa non-DepEd providers sama sa private high schools, private higher education institutions (HEIs), SUCs ug LUCs nga naghanyag og Senior High School.

Gilauman sa DepEd nga ang 1.2 – 1.6 milyones ka mga estudyante gikan sa public high schools ang mo enrol sa Grade 11 sunod tuig ug 2017.

Subay niini nga programa, nagkataas ang ihap sa panginahanglan sa pasilidad nga magamit alang niini.

Alayon niini, naningkamot si Cong. Law nga madugang ang ihap sa mga napabarug nga lawak tunghaan isip “long term support” sa edukasyon ug magsilbing hinanali nga tubag sa panginahanglan sa naasoy’ng programa.

Gawas niana, naningkamot usab ang Kongreso nga madugangan ang alokasyon alang sa pag-hire sa bag-ong magtutudlo.

Sa datos usab sa Deped sa mga tuig 2010 – 2014, naka-hire na kini og 128,055 ka mga bag-ong magtutudlo ug nakapatukod na kini og 88,805 ka mga lawak tunghaan sa tibuok nasod.

Imbestigador Seminaron vs Dismissed Drug Cases

Ni Alex Mapoy

PRO 13 Spokesperson PSupt. Martin Mercado Gamba.

BUTUAN CITY – Ipailawom sa refresher course ang mga pulis nga nag-imbestiga sa malamposon unta nga ronda kontra druga, apan, pagduso sa kaso ngadto sa korte, na abswelto lamang.

Rekomendasyon kini ni PSupt. Martin Mercado Gamba, ang tigpamaba sa Police Regional Office (PRO) 13 human nasuta nga pipila ka mga kaso nga giduso sa kapulisan ngadto sa korte ang nabasura taliwala nga nakuhaan ang gitudlong drug pushers sa lig-on nga ebidensya.

Sumala ni Gamba, tanang pulis sa rehiyon ang napailawom na kini sa daghang seminars kalabot kon unsaon pagpahigayon sa pagronda ngadto sa mga drug pushers ug sa higayon nga isang-at na kini ngadto sa korte, makonbekto ang dinakpan.

Dugang ni Gamba, kon maabswelto lang ang drug pushers sa kasong gisang-at sa kapulisan human nakuhaan og drugas atol sa gihimong ronda, sayang lamang ang paningkamot sa han-ay pagsumpo sa nasangpit nga problema.

Subay niini, girekomenda sa opisyal nga mas maayong ipailawom sa usa ka refresher course kadtong mga pulis nga maoy nag-imbestiga ug nagduso sa kaso bahin sa druga ngadto sa korte, apan, na abswelto lamang.

Ipasusi usab sa opisyal kon kinsa kadtong mga hingtungdang imbestigador sa druga nga na absweltohan aron sa labing dali nga panahon mapailawom kini sa refresher course.

“Balikan nato paglantaw kinsa nga mga imbestigador nga pulis nga naghawid sa kaso kabahin sa druga nga na abswelto. Mas maayong ipailawom nato sila og refresher course aron subleng malab-as ang kahibalo nga nakat-onan kabahin sa pagpahigayon og ronda ug dili maabswelto ang kaso,” tipik sa rekomendasyon ni Gamba.

Gitin-aw pa sa opisyal, kadto lamang imbestigador nga na absweltohan og kaso sa druga ang ipailawom sa refresher course ug dili tanang pulis maoy ipailawom tungod sa kadaghan membro sa han-ay. 

Kliyente sa Parole Gibalayan

Ni Alex Mapoy

Mga tawo nga nagtinabangay pagpabarug sa gamay nga balay 

sa usa sa mga kliyente sa Parole and Probation Butuan. 

Courtesy of PPA-DOJ Butuan.

BUTUAN CITY – Sangko sa langit ang pagpasalamat sa usa sa gatosan ka mga kliyente sa Parole and Probation Administration (PPA) Butuan human kini natabangan nga makabaton og kaugalingong pinuy-anan.

Nahatagan og katumanan ang maong damgo subay sa paningkamot sa kadumalahan ni Chief Probation and Parole Officer Cristina R. Argente uban sa pag-abag nila Parole and Probation Office II Alex Castaños ug Parole and Probation Office II Ester Samano.

Ang pagtabang paghatag og kaugalingong panimay sa usa sa gatosan niini ka mga kliyente maoy pinakaunang nahitabo sa kasaysayan sa PPA Butuan isip kabahin sa pagpatuman sa Restorative Justice Circle of Support sa ahensya.

Gawas sa paningkamot ni Argente ug mga kaubanan, nitabang usab ang mga Volunteer Probation Aide (VPA) sa pagpanguna ni President Linda Alcasid kinsa nagtinabangay pag-amot pagpalit sa gikinahanglang materyales.

Hulagway sa mga tawo nga nitabang pagpanday sa balay sa kliyente 

sa PPA Butuan. Courtesy of PPA-DOJ Butuan.

Napabarug ang maong panimay sa luna nga gipanag-iyahan ni VPA Bernardita Curalde kinsa boluntaryong nihanyag nga sa gipanag-iyahan niining yuta itarok ang panimay sa kliyente nga gitabangan partikular na diha sa usa sa mga purok sa Brgy. Doongan ning siyudad.

Basi sa asoy ni Argente, ang maong kliyente kinsang pangalan ang gipugngan ning mantalaan ang produkto sa “broken family.”

Tungod sa maong kahimtang, nabuwag kini sa ginikanan ug panahon nga duna kini personal nga problema, wala siyay tawo nga kadangpan.

Mismo ang kaugalingon niining igsuon sa gawas, ang niprangka kaniya nga dili siya makapapuyo ug makapakaon sanglit duna kini daghang mga anak ug wala na kini “extra budget” aron pagpalit og pagkaon sa naasoy’ng kliyente sa buhatan.

Bunga sa subra ka desperado sa kinabuhi ug wala nagiyahan pagsubay sa hustong dalan, nakalapas kini sa balaud hinungdan siya na silutan.

Swerte na lamang nga nagiyahan ang nahisgutan nga mo dangop sa PPA Butuan hinungdan nga niduso kini og aplikasyon aron makapahimulos sa programa niini ug mapailawom sa superbisyon.

Na aprubahan sa buhatan ang aplikasyon hinungdan nga napailawom kini sa superbisyon sa buhatan ilawom sa kadumalahan ni Argente.

Hulagway sa kinatibuk-ang balay sa kliyente. Courtesy of PPA Butuan

Dihang napasibaw sa nahisgutan ang gihambin niining suliran isip usa sa mga kliyente sa buhatan, nagkasabot ang kadumalahan ni Argente uban sa pag-abag sa mga kaubana ug VPAs, gihatagan og pinuy-anan ang nauwahi.

Dulot sa galamhan sa kliyente ang pagpasalamat ngadto sa tanang nitabang kaniya labi na nga gitabangan kini paghimo og kaugalingong kapuy-an diin nabati niini ang gugma ug pagpangga nga wala niya natilawan gikan sa kiliran sa iyang kadugo.

Sa pagsulat niini nga balita, nagtrabaho isip construction worker ang nahisgutan, apan, plano sa buhatan nga tabangan kini nga makakaplag sa usa ka stable nga panginabuhi pinaagi sa pakig-alayon ngadto sa pundok nga andam mo tabang sa mga nanginahanglan.

Football Festival Gipangandaman

Ni Alex Mapoy

Campaign material of 5th Balangay Football Festival.
Courtesy of Lawig Katawhan

BUTUAN CITY – Gipangandaman karon sa District Constituency Office ni Agusan del Norte First District Representative Atty. Lawrence Lemuel Fortun ang nagsingabot nga pagbukas sa duha ka adlaw nga 5^th Balangay Football Festival.

Ipahigayon ang maong kalihokan sa Butuan City Sports Complex nga nahimutang diha sa Brgy. Libertad ning siyudad karong Mayo 16 – 17 ning tuiga.

Basi sa facebook page sa Lawig Katawhan, gidapit sa Butuan - Agusan Norte Football Association (BANFA) ang publiko pagsaksi sa maong kalihokan.

“YOU'RE INVITED: The Butuan-Agusan Norte Football Association (BANFA) will be holding the 5th Balangay Football Festival on May 16 – 17, 2015, Saturday and Sunday, at the Butuan City Sports Complex, Libertad, Butuan City,” imbitasyon sa Lawig Katawhan.

Sumala ni District Constituency Office Public Information Officer Ian Sabado, ang maong kalihokan bukas sa tanang mahiligon sa maong duwa.

Walay gipili nga edad sa mahimong partisipante sanglit bugtong katuyuan niini mao ang pagtabang ni Cong. Fortun pagpalambo sa kaugalingong katakos, mas mapalapdan ang disiplina sa kaugalingon, mas mapakusog ang pakigsandurot ngadto sa kaubanang magduduwa, ug daghan pang uban.

Sa maong aktibidad, dugang ni Sabado, mahimong alegre ug dili makalimtan sa mga mahiligon sa maong duwa ang kasinatian ning panahon sa summer.

Hisayran nga dili lamang kini nga matang sa paugnat sa kusog ang gipasiugdahan ni Cong. Fortun kondi, dunay basketball, volleyball, ug uban pang matang sa sports nga makatabang pagpalambo sa kalaski sa panglawas.

Alang sa kongresista, ang laski ug himsog nga panglawas, usa ka maayong “assets” nga ang usa ka indibidwal mahimong produktibo diha sa katilingban.

Submission sa Scholarship ni Law, Tak-opan

Ni Alex Mapoy

Agusan del Norte First District Representative
Atty. Lawrence Lemuel Fortun. Courtesy
of Lawig Katawhan

BUTUAN CITY – Isa ka semana na lang ang nahibilin alang sa pagpangdawat og aplikasyon sa scholarship grant ni Agusan del Norte First District Representative Atty. Lawrence Lemuel Fortun .

Sumala ni District Constituency Office Public Information Officer Ian Sabado, hangtod Abril 30 lamang ang pagpangdawat og aplikasyon sa mga estudyante nga interesado nga mo avail sa scholarship grant sa kongresista.

Dugang ni Sabado, mintras duna pay higayon, kinahanglan nga magpasa na kining daan og aplikasyon aron dili kini matak-opan.

Gitin-aw sa opisyal, nindot ang maong programa sa kongresista sanglit makapili ang aplikante sa kurso nga pagakuhaon sa kolehiyo.

Pasabot pa sa opisyal, kon madawat ang aplikasyon, mahimo kining makatungha sa mga sikat nga unibersidad o kaha kolehiyo sa bisan asang dapit sa nasod, ubos sa kondisyon, accredited kini sa programa sa Butuanon nga magbabalaud.

Sayon lamang ang mga rekisitos nga gikinahanglan nga isukip sa aplikasyon sama sa mo sunod: dunay general average nga 80% sa high school, certificate of good moral, card form 138 sa high school, indigent certificate gikan sa barangay, Income Tax Return (ITR) sa ginikanan, ug andam nga mo padayon sa pagtungha sa kolehiyo.

Basi sa impormasyon sa opisyal, sa pagsulat niini nga balita, lagpas na sa isa ka libo ka mga estudyante ang nakaduso sa ilang aplikasyon.

Kutob lamang sa kataposan ning bulana ang pagpangdawat hinungdan nga gidasig sa opisyal nga mo sumite na sa ilang aplikasyon sa buhatan sa kongresista aron kini maka-avail sa maong nindot nga kahigayonan.

Hisayran nga sa nakalabay’ng tuig, kapin sa isa ka libo ka mga estudyante ang nakabenepisyo sa nasangpit nga programa sa kongresista diin ning tuiga, hingpit na usab sila nga naka-renew sa scholarship.

Saving Tips vs El Niño Gipagawas

Ni Alex Mapoy

BCWD Senior Public Relation Officer Ramil Barquin. 

BUTUAN CITY – Bisan bastante pa ang suplay sa tubig sa Butuan City Water District (BCWD), nagpagawas nang daan ang buhatan og Water Saving Tips ngadto sa mga konsumidor.

Gihimo kini sa kadumalahan ni BCWD General Manager Anselmo Sang Tian tungod sa nagtunhay nga El Niño Phenomenon.

Sumala ni BCWD Senior Public Relation Officer Ramil Barquin, wala pa na apektohan ang suplay sa tubig sa nasinatiang huwaw.

Dugang ni Barquin, bisan wala pa na apektohan ang suplay sa water district, nanghatag na sila og mga tips unsaon pagdaginot sa tubig.

Gitin-aw sa opisyal, inisyatiba kini sa water district aron magamit sa husto ang tubig ug dili kini masayang.

Pasabot usab sa opisyal, ang tubig, kinabuhi hinungdan nga dili kini usikan.

Water Saving Tips of Butuan City Water District.

Pipila sa mga Water Saving Tips ang mo sunod: dili iyabo ang tubig nga gigamit pagwaswas sa nilabhan, hinono-a, angayan kining tigumon aron magamit sa comfort room alang sa paghinlo ug pag-flushing sa hugaw. Kon mo gamit og washing machine, kinahanglan nga gamiton ang “economy cycle” kaysa “normal cycle” sanglit nanginahanglan lamang kini og gamay nga tubig; sa paghugas og plato, ang gigamit sa paghugas sa tubig, kinahanglan nga dili kini iyabo sanglit magamit pa kini paglaba sa trapo sa kusina; ug kon maligo gamit ang shower, angayang pagngon kini samtang nanabon aron dili masayang ang tubig. Mas maayong dili kini magdugay pagkaligo aron dili daghang tubig ang mausik; kon ugaling mang-toothbrush, angayan nga mo gamit kini og baso aron isulod ang tubig para pang-toothbrush ug likayan nga mo diretso kini pag-toothbrush gamit ang tubig nga niagas sa gripo sanglit daghang tubig ang masayang; ug daghan pang uban.

Sa maong pamaagi, gawas nga makadaginot sa gikonsumo nga tubig, mas mo gamay usab ang bayrunon niini.

Nanghinaut na lamang ang opisyal nga pinaagi sa maong kasayuran, maminusan ang tubig nga na usik kaysa nagamit. 

OWWA Caraga Dunay Bag-ong Director

Ni Alex Mapoy

OWWA Caraga OIC Programs and Services
Chief Ma. Ireen Cambaling. 

BUTUAN CITY – Bag- na karon ang liderato sa Overseas Workers Welfare Administration (OWWA) Caraga.

Pagkomperma kini sa buhatan pinaagi ni OWWA Caraga OIC Programs and Services Chief Ma. Ireen Cambaling.

Sumala ni Cambaling, gipahayag sa opisyal nga adto pang Abril 13 ning tuiga ang pormal nga paglingkod sa bag-ong direktor sa ahensya.

Sa maong okasyon usab, gihimo ang hamubo nga turnover ceremony diin gitugyan pormal ni Regional Director Eduardo Bellido ang kadumalahan ngadto kang Regional Director Samuel S. Madrid.

Subay niini, si Dir. Madrid na ang magdumala sa ahensya ning rehiyon ug lauman nga matutukan na pag-ayo ang buhatan.

Si Dir. Madrid, usa ka lumad nga Bikolano.

Una kining nadestino isip Regional Director sa Zamboanga Peninsula (Region IX), Cordillera Autonomous Region (CAR), ug Western Visayas (Region VI).

Human nadestino sa nahisgutang mga rehiyon, nahimo kining Welfare Officer sa Muscat, Oman ug Al Khobar, Saudi Arabia adiser kini natudlo isip Regional Director ning rehiyon.

“Inform ko lang po na bago naman ang aming regional director. Dir. Samuel S. Madrid. He is out of town today,” tipik sa text message ni Cambaling.

Dumduman nga adiser nahiabot si Dir. Madrid sa Caraga, gidumala ang ahensya ni Director Bellido.

Panagsa lang makita sa buhatan ning rehiyon si Dir. Bellido sanglit duha ka rehiyon ang gidumala niini, ang Southern Mindanao Region (Davao Region XI) ug ang Caraga region.

Gibahin ni Dir. Bellido ang iyang panahon sa pagserbisyo sa duha ka rehiyon hinungdan nga dunay mga panahon nga dili kini makit-an sa rehiyonal nga buhatan sa maong ahensya ning rehiyon.

Bisan pa man, naningkamot pa gihapon ang nahisgutang direktor nga madumala pag-ayo ang duha ka rehiyonal nga buhatan sa ahensya. 

Katukoran sa Multi-Purpose Gipundohan

Ni Alex Mapoy

Kapitolyo Probensyal sa Agusan del Norte. 

AGUSAN DEL NORTE – Gipasalig sa probensyal nga panggamhanan sa Agusan del Norte nga hatagan og pundo ang ipabarug nga Multi-purpose Hall cum Evacuation Center sa Brgy. Del Pilar, dakbayan sa Cabadbaran.

Sa maong proyekto, nipasalig si Provincial Governor Ma. Angelica Rosedell “Angel” M. Amante-Matba nga mohatag kini og P3 milyones alang sa hingpit nga katumanan niini.

Segon ni Aimee B. Sienes sa Kapitolyo Probensyal, ang nahisgutang pundo magsilbing “counterpart” sa probensyal nga panggamhanan sa maong proyekto.

Gikuha ang pundo gikan sa 5% nga Provincial Disaster Risk Reduction and Management Fund (PDRRMF) CY 2014.

Sa higayong mahuman ang maong proyekto, magsilbi unya kining “housing” o “evacuation facility” panahon sa kalamidad.

Nagsilbi usab kining kabahin sa “emergency mitigating measures” alang sa pagluwas sa kinabuhi ingon man mga kabtangan sa mga molupyo sa maong barangay.

Ang maong proyekto usab na sulod sa Disaster Risk Reduction Management Programs sa probensya kansang panginahanglan panahon sa katalagman ang matubag sa mao unyang pasilidad.

Subay niini, gihatagan og kagahom sa Sangguniang Panlalawigan sa probensya si Gov. Matba pagperma sa Memorandum of Agreement tali sa Barangay Government sa Del Pilar, sakop sa nahisgutang siyudad.

Gihimo ang maong kasabotan aron pagseguro sa paspas nga implementasyon sa naasoy’ng proyekto.

Police Visibility vs Kriminal Gipakusgan

Ni Alex Mapoy

BUTUAN CITY – Mas gipahugtan karon sa kadumalahan sa Butuan City Police Station 1 ang pagpatuman sa police visibility labi na nga nagkaduol na ang pangilin sa dakbayan sa Butuan partikular na sa patron, Sr. San Jose.

Subay niini, nakahukom si Police Regional Office (PRO) 13 Regional Director Police Chief Superintendent David Yalong Ombao nga dugangan ang personahe sa nahisgutang buhatan.

Station Commander Police Senior Inspector Nefre Telewik Acaso.

Gikabutyag ni Station Commander Police Senior Inspector Nefre Telewik Acaso, ang maong lakang kabahin sa pagpakusog sa “Police Visibility” sa tibuok area of responsibility (AOR).

Dugang ni Acaso, ang mahitabong “downloading” sa mga personahe ang posibleng mahitabo ning bulana.

Gi-angkon sa opisyal nga gikalipay niya pag-ayo ang maong pagdugang sa iyang mga sakop sanglit dako kaayo kini og ikatabang nga mamintina ang kampanya sa “police visibility.”

Ang pagpakusog sa police visibility, kabahin kini sa implementasyon sa Patrol 101.

Basi sa kasinatian sa opisyal, nahimong epektibo ang Patrol 101 sa nakalabay’ng tuig human gidugangan og personahe ang iyang kadumalahan.

Patrol Car sa Butuan City Police Station 1.

Taliwala pa man, bisan diyutay lamang ang ihap sa iyang ginsakpan, apan, paningkamotan sa iyang kadumalahan nga malibot ang tibuok AOR aron magpanagana ang mga dautang elemento paghimo sa dautan niining laraw.

“Gipadayon ang atong Patrol 101. Usa kini ka mandato sa atong regional director nga si PSuptC Ombao. Hangtod karon, atong ipadayon. Karong bulana, dugangan sa regional direktor og personnel ang Butuan City Police Station 1 aron madugangan ang implementation sa Patrol 101. So, adunay downloading mahitabo. So, dako kaayo namo kining kalipay labi na nga nagkaduol na ang kapistahan dire sa Butuan. Sa atong na obserbahan, sa niaging tuig, daghang na augment nga personnel sa buhatan. Totally, wala gyuy mga dagko nga panghitabo tungod sa Patrol 101. Bisan karon, gamay ra ang atong kapulisan, ato gihapong paningkamotan nga malibot ang atoang area of responsibility aron makita sa katawhan ang presensya sa kapulisan,” pahayag ni Acaso.

El Niño, No Effect - PCA

Ni Alex Mapoy
BUTUAN CITY – Wala pa naka-apekto sa industriya sa lubi sa Caraga ang kasamtangang huwaw nga nasinatian ning rehiyon.

Pagklaro kini ni Philippine Coconut Authority (PCA) Caraga Acting Project Development Officer Grace Orilla. 

Sumala ni Orilla, bag-ohay pa lamang nasinatian ang huwaw sa rehiyon hinungdan nga dili pa kini maka-apekto sa pagbunga sa lubi.

Dugang ni Orilla, nakabunga nang daan ang mga lubi adiser nasinatian ang nagtunhay nga huwaw hinungdan nga dili pa kini maapektohan.

PCA Caraga Acting Project Development
Officer Grace Orilla

Gipasabot sa opisyal, dakong tabang sa kalubihan ning rehiyon ang gi-apud apud nga mga abuno sa lubi sanglit nakabuylo pag-ayo ang pagpamunga sa kalubian.

Apan gi-angkon sa opisyal, kon mo lungtad sa unom ka bulan o subra pa ang nasinatiang huwaw ning rehiyon, segurado nga maapektohan na niana ang produksyon sa lubi.

Kon ugaling mahitabo ang maong senaryo, gitin-aw sa opisyal nga diha na usab masinatian sa katawhang Caraganon labi na sa mga “coco farmer” nga masandaw ang tinanom niining lubi.

Bunga sa subra ka init, dili na makabuylo sa pagpamunga ang lubi ug niana maapektohan na ang produksyon.

Sa mao unyang kahimtang, maapektohan ang kinitaan sa mga coco farmer labi na niadtong nagsalig lamang sa produksyon sa tinanom niining lubi.

Sa pagsulat ning balita, gitin-aw sa opisyal nga ang produksyon sa lubi ning rehiyon ang padayong nagkataas dungan sa panghinaut nga magpadayon kini nga kahimtang aron ang mga mag-uuma sa lubi, molambo ang estado sa pamuyo. 

Bangko Gi-ataki sa Budol - Budol

Ni Alex Mapoy

BUTUAN CITY – Pipila ka mga bangko sa dakbayan sa Butuan ang nahimong suki ug nabiktima na sa mga membro sa Budol – Budol Gang.

Pagkomperma kini sa kasamtangang kadumalahan sa Development Bank of the Philippines (DBP) Butuan Branch atol sa gipahigayong press conference sa Police Regional Office (PRO) 13 sa sayong bahin ning bulana.

Gitug-an sa kadumalahan sa nasangpit nga bangko ngadto kang Police Chief Superintendent David Yalong Ombao, ang Regional Director sa PRO 13, pipila ka mga bangko nga anaa sa J.C Aquino Avenue ning siyudad ang nahimo nang suki sa Budol – Budol Gang.

Modus sa grupo mao ang paglipat sa teller diin ang liboan ka pesos nga salapi, ang pa sensilyohan kini sa tag – P500. Ihatag sa teller ang kantidad nga gisensilyo sa tag – P500 ngadto sa kliyente. Dawaton kini sa kliyente ug suble kining ibalik nga ipa-sensilyo sa tag – P100 kansang kantidad ang gikuhaan na.

“Split of seconds” lang ibalik ang maong kwarta ngadto sa teller kinsa nagtuo nga wala kini kuhai sanglit gibalik man dayon kini, apan, nakasibat na ang kliyente nga membro sa Budol – Budol Gang, anha pa nahibaw-an sa teller nga kulang na og libuan ka pesos ang kwarta nga gibalik sa gika-transact nga kliyente.

“Kun wari magpa-small bills and they are so fast. Kung wari P1000, magpa-small bills ng tig-P500, so binigyan. Pagkatapos, ibinalik ang pera sa teller at pina-small bills nang tig-P100. Pero yong pera na ibinigay ay kulang na. para silang magician. Ang kanilang kamay ay so fast,” tipik sa pag-asoy sa manager sa DBP Butuan Branch.

PRO 13 Regional Director Police Chief
Superintendent David Yalong Ombao. 

Subay niini, nihangyo ang kadumalahan sa DBP Butuan Branch sa kadumalahan ni Ombao nga imintina ang “police visibility” labi na sa mga dapit nga dunay bangko aron magpanagana ang membro sa mangingilad sa paghimo sa dautan niining laraw.

Sa bahin usab ni Ombao, nibawos usab kini paghangyo sa kadumalahan sa tanang bangko ning siyudad labi na kadtong nabiktima sa maong matang sa pagpangilad nga makig-alayon kini sa kapulisan aron matun-an ang estilo sa mga mangingilad, mahimuan og cartographic sketch ang mga suspetsado, ug mahimuan sa konkretong solusyon ang maong matang sa pagpangilad sa ingon kini masumpo.

Dugang ni Ombao, wala niya gikahimuot ang maong impormasyon nga nadawat nga gawas sa pipila ka mga indibidwal nga nabiktima sa mga membro sa Budol – Budol Gang, apil usab ang pipila ka mga bangko ang nabiktima niini.

“I really hate bank robbery,” tipik sa tubag ni Ombao.

Nagtuo ang opisyal nga possible nga usa lamang ka grupo sa Budol-Budol Gang ang nihimo sa maong pagpangatake hinungdan nga angayan lamang nga motambayayong ang kadagkuan sa bangko bahin sa maong isyu aron matumbok ug madakop ang mga responsable aron manubag sa salaud nga nahimo.