Tuesday, August 25, 2015

Serbisyong Pangkalinaw Gitunol

Ni Alex Mapoy/PIA Caraga
Gilauman sa nagkadaiyang ahensya sa goberno nga magdala og kalinaw sa lungsod sa Marihatag, Surigao del Sur ang nagkadaiyang serbisyo nga gitunol sa Peace Caravan. Photo courtesy of PIA Caraga
MARIHATAG, Surigao del Sur – Dul-an 15,000 ka indibidwal ang natunulan sa nagkadaiyang serbisyo nga gihanyag sa Association of Caraga Executives (ACE) ug Office of the Presidential Adviser on Peace Process (OPAPP) atol sa gihimong Peace Caravan o Serbisyo Caravan sa Barangay San Isidro Gym lungsod sa Marihatag, Surigao del Sur kagahapong adlawa.

Katuyoan sa kalihokan mao ang paghatag sa nagkadaiyang panginahanglan sa mga residente sa unom ka mga barangay sa naasoy’ng lungsod nga naglangkob sa San Pedro, San Isidro, Mahaba, Mararag, Bayan, ug Amontay.

Tanang residente sa nahisgotang mga barangay ang nakapahimulos sa serbisyong panglawas, panginabuhian, edukasyon, legal, veterinary consultation, isyu sa yuta, hauling services, voter registration, pagpanghatag og food packs, birth registration, feeding, ug pag-asdang sa adbokasiyang pangkalinaw.

Atol sa kalihokan, gitunol sa Department of Environment and Natural Resources (DENR) Caraga Regional Office ang mga “land certificates,” ug 1,000 ka mga rubber tree seedlings.

Gawas niana, gitunol usab ni DOH-Caraga headed by regional director Jose R. Llacuna, Jr. ngadto sa mga benepisyaryo ang Jerry cans, hygiene kits, toilet bowls, ug gamit pang-pamilya.

Wala usab nagpaulahi si Department of Agrarian Reform (DAR) Caraga Regional Director Julita Ragandang kinsa nilawas nga nitunol sa Common Service Facilities (CSF) sama sa rice threshers ug tractor nga dunay kinatibuk-ang kantidad nga P1,700,000 ngadto sa mga kooperatiba sa mga mag-uuma sa nahisgotang lungsod.

Lakip usab sa gitunol sa ahensya ang certificate of land ownership award (CLOA), nga mas naila nga “land titles” ngadto sa 24 ka mga mag-uuma.

Ang nahisgotang mga titulo naglangkob kini sa 46.7 ka ektaryang luna nga haum tikaron sa mga mag-uuma nga nahimutang sa Brgy. Bucawe, lungsod sa Lianga, Surigao del Sur.

Gitunol usab ni TESDA-Caraga Regional Director Florencio Sunico og TESDA scholarships vouchers nga nagkantidad og P400,000 alang sa mga residente sa lungsod sa Marihatag.

Alang kang Surigao del Sur Governor Johnny Pimentel, ang maong kalihokan nagsilbing paagi pagpakita ngadto sa katawhan sa lungsod sa Marihatag nga nagtinabangay ang nasudnon ug lokal nga ahensya sa goberno pagtunol sa gikinahanglang serbisyo sa katawhan.

No comments:

Post a Comment