AlkanSSSya Program Mihinay

Ni Alex Mapoy

Wala nakita sa mga piniriso ang kaayohan nga naghulat kanila sa unahan kabahin sa malahutayong paghangop sa AlkanSSSya Program sa BJMP ug SSS.  

BUTUAN CITY – Nihinay human wala hatage og importansiya sa mga piniriso ang gibida sa Bureau of Jail Management and Penology (BJMP) Caraga nga AlkanSSSya Program uban ang Social Security System (SSS).

Dumduman nga adtong Hunyo 5 ning tuiga, gilusad sa BJMP Caraga uban ang mga kadagkoang opisyal sa SSS ang nasangpit nga programa nga nagtumong pagtudlo sa mga piniriso nga magtigom samtang anaa kini sulod sa prisohan.

Maayo ang tinguha sa ahensya sanglit sa higayon nga makagawas o makahuman pagserbisyo sa sentensiya, ang hingtungdang piniriso ang duna unya kini kapaninguhaan gamit ang tinigom niining salapi samtang kini na priso.

Sumala ni SSS Butuan Assistant Branch Head Arnold Pepino, maayo lang sa pagsugod ang mga nahisgotan, apan sa lahutay, medyo nagkaluya kini pagsanong sa maong programa.

Una nang gitambagan ni SSS AVP Northern Mindanao Division Atty. Edwin Alo atol sa paglusad sa programa ang mga piniriso nga batasanon ang paghulog sa kaugalingong AlkanSSSya sanglit walay laing makapahimulos sa umaabot kondi ang hingtungdan ra usab.

Giklaro pa sa opisyal, ang pagka-priso dili makonsiderang babag aron ang matag usa, makabaton og tinigom aron kon kini makagawas na o kaha mahimo nang gawasnon, duna kini kapaninguhaan o himuong capital sa tukuron unya niining gamay nga negosyo.

Hisayran nga walay limit kon pila ang mahulog sa piniriso sa kaugalingong alkansiya ug kon pila ang matigom niini sa tibuok bulan, mao usab kini ang magsilbi nilang monthly remittance ngadto sa SSS.