Hospitals Gipaaktibo Batok MERS-CoV

Ni Alex Mapoy

DOH Caraga Regional Director Dr. Jose R. Llacuna, Jr. Photo by 
Alex Mapoy 

BUTUAN CITY – Gi-aktibo na sa Department of Health (DOH) ang pipila ka mga balay tambalanan sa tibuok nasod isip pagpangandam kon ugaling makasulod ang Middle East Respiratory Syndrome Corona Virus (MERS-CoV).

Alang sa ahensya, gihimo kini aron kon ugaling makasulod ang maong virus dinhe sa nasod, adunay tambalanan ang awtomatiko nga mo atiman sa mataptang pasyente.

Sa pagsulat ning balita, giklaro ni DOH Caraga Regional Director Dr. Jose R. Llacuna, Jr. nga pabiling MERS-CoV Free ang tibuok nasod.

Sumala ni Dr. Llacuna, ang MERS-CoV dili makonsidera nga airborne disease o sakit nga mo takod pinaagi sa hangin. Makatakod matod pa kini person-to-person hinungdan nga dili kini angayang kabalak-an.

Ang pasyente nga mataptan niining matanga sa sakit lakip na ang pamilya niini ang kinahanglan nga ipailawom sa quarantine aron daling mapakgang ug dili mo kuyanap ang maong sakit.

Dugang ni Dr. Llacuna, gawas sa pag-aktibo sa pipila ka mga tambalanan, subsob usab ang gihimong “surveillance” dili lamang sa airports kondi lakip na sa nagkadaiyang ospital.

Alayon niini, gitambagan sa opisyal ang katawhan nga batasanon ang pagpanghugas sa kamot aron malikay kini sa maong matang sa sakit.

Pipila matod pa ka simtoma sa maong sakit ang pagpanakit sa kalawasan, hilantan, ubo, ug maglisod ang paginhawa.

Dali usab nga giklaro sa opisyal kon ugaling makasinati sa maong simtoma ang usa ka indibidwal, wala kini nagpasabot nga nataptan na kini og MERS-CoV gawas lamang kon ang hingtungdan gikan sa Middle East.