IPs sa Caraga Gi-assess

Ni Alex Mapoy

Coordinated with the chieftain and Military detachment. Photo 
File of Maria Cecilia Sosas.

BUTUAN CITY – Unom ka mga tribo nga nagtunhay ning rehiyon sa Caraga ang lakip nga gipailawom sa family assessment sa Department of Social Welfare and Development (DSWD) Caraga.

Gilangkoban kini sa Manobo, Mamanwa, Higaonon, Talaandig, Banwaon, ug Mandaya kinsa namuyo sa suok nga bahin ning rehiyon nga layo sa sibilisasyon.

Sa impormasyon ni Maria Cecilia Sosas sa Social Marketing Unit sa DSWD Caraga, gipaningkamotan sa mga field enumerators nga ma-assess ang tanang tribo sa Indigenous Peoples (IPs) ning rehiyon.

Isa sa mga enumerator, segon ni Sosas nga si Christopher Abuzo, kinsa nadestino sa lungsod sa San Francisco Agusan del Sur, nisaysay nga dili lalim ang pagkuha og mga datos gikan sa mga IPs labi pa nga atua kini nanimuyo sa hilit nga lugar.

Bisan pa man, madasigon matod kini nga nihimo sa tahas nga gisangon kaniya sanglit alang kaniya, ang datos nga iyang makuha maoy makatabang nga mausab ang dagan sa kinabuhi sa mga nahisgotan.

Una nang gipahimangnoan ni DSWD Caraga Regional Director Minda B. Brigoli ang mga field workers nga tanang pamilya ang i-assess ug kinahanglan nga dili kini biyaan.

Ang pag-assess sa mga pamilya subay kini sa Listahanan Project nga gipatuman sa nasodnong kagamhanan ug gisangon sa DSWD.

Katuyuan niini mao ang pag-update sa database sa “kabos nga pamilya” ug usab maghatag sa mas dekalidad nga datos sa ingon matabangan ang tanang partners sa ahensya sama sa mga ahensya sa goberno ug ubang stakeholders nga maoy magsilbing sumbanan sa ipatuman niining “Social Protection Programs and Services.”