Opcen Naka-24/7 Batok MERSCoV

Ni Alex Mapoy

DOH Caraga Regional Director Dr. Jose R. Llacuna, Jr. Photo

by Alex Mapoy

BUTUAN CITY – Gipaneguro sa Department of Health (DOH) Caraga nga abre baynte-kwatro (24) oras ang Operation Center alang sa pagtubag sa mga pangutana kabahin sa Middle East Respiratory Syndrome Corona Virus (MERS-CoV).

Ang nahisgotang lakang gihimo subay sa gipakusgan nga pagpangandam sa posibleng pagsulod sa maong sakit dinhe sa nasod.

Gikabutyag ni DOH Caraga Regional Director Dr. Jose R. Llacuna, Jr. tuyo niini nga mahatagan sa hinanaling aksyon ug tubag ang tawag lambigit sa MERSCoV.

Subleng gipaneguro usab ni Dr. Llacuna, ang Bureau of Quarantine, hugot nga nag-monitor sa tanang “point of entry” sa nasod aron maseguro nga masusi ang tanang nangabot gikan sa gawas sa nasod.

Dugang ni Dr. Llacuna, tanang nangabot nga biyahero ang gipa-fill-up sa “health checklist” isip kabahin sa pagpugong pagsulod sa MERS-CoV sa nasod.

Gipaabot usab sa direktor nga nakigtagbo si Health Secretary Janette Garin sa mga representante sa pribadong ospital aron kon dunay mamatikdang pasyente nga nataptan sa maong sakit, ipaabot gilayon kini sa ahensya.

Sa pinakaulahing datos sa World Health Organization (WHO), nilansang na sa 154 ka mga kaso sa MERSCoV ang natala diin lakip na niini ang 1 ka kaso sa China samtang 19 na ka tawo ang namatay.

Hisayran ang Middle East Respiratory Syndrome (MERS) usa ka “viral respiratory illness” gumikan sa corona virus nga kasamtangang gitawag og MERSCoV.

Unang kaso sa maong sakit natala adtong Abril 2012 sa Saudi Arabia ug nasuta sa pinakaulahing pagtuon sa mga eksperto, ang camel maoy posibleng gigikanan sa maong makamatay’ng sakit nga nitakod sa tawo.