P366-M Gigahin sa Pensioners

Ni Alex Mapoy

DSWD Caraga 4Ps Information Officer Ryan Malbas Tapayan. Photo
by Alex  Mapoy

BUTUAN CITY – Gipaninguha sa Department of Social Welfare and Development (DSWD) Field Office Caraga nga sulod ning tuiga, mahatagan og social pension ang 61,044 ka mga indigent senior citizens ning rehiyon.

Ang nahisgutang ihap gikan kini sa lima ka probensya ning rehiyon nga gilangkoban sa Surigao del Sur, Surigao del Norte, Agusan del Sur, Agusan del Norte, ug Province of Dinagat Islands (PDIs).

Sumala ni DSWD Caraga Pantawid Pamilyang Pilipino Program (4Ps) Information Officer II Ryan Malbas Tapayan, ang social pension alang sa indigent senior citizens magsilbing ayuda sa goberno ngadto sa mga nahisgutan.

Dugang ni Tapayan, madawat sa social pensioner ang tag – P500 matag bulan isip monthly stipend sa ingon matabangan kini nga makapalit sa inadlaw’ng panginahanglan sama sa tambal, pagkaon, ug daghan pang uban.

Gipahayag ni DSWD Caraga Regional Director Minda B. Brigoli, CESO III, angayan lamang nga mahatagan sa saktong pag-amoma ang mga nahisgutan labi na nga nahikawan kini sa pag-atiman sa mga minahal niini sa kinabuhi.

Nipasalig si Brigoli nga madawat sa mga nahisgutan ang tag – P500 nga monthly pension pinaagi sa DSWD kansang ahensya maoy gitahasan sa goberno.

Hisayran nga madawat ang monthly stipend sa mga social pensioner matag kwarter diin madawat niini ang P1,500 katumbas sa tulo ka bulan.

Mahimo kining madawat pinaagi sa cash pay-out, transfer of fund to LGU, ug door-to-door delivery scheme.

Mahimo lamang social pensioner ang isa ka senior citizen kon kini nag-edad 65 anyos pa taas, luya, masakiton, laygay na, walay klarong kinitaan, wala nagdawat og pension gikan sa SSS, GSIS, ug uban pang insurance company, ingon man, pait ang kahimtang sa panginabuhi.

Ning tuiga, ang target beneficiaries nga 61,044 gipundohan kini’g P366,264,000 kansa mas dako kon itandi sa nakalabay’ng tuig nga gipundohan balor P113,538,000 alang sa 18,923 ka mga benepisyaryo.