Membro sa NPA, Mayorya Mga Lumad

Ni Alex Mapoy

GUN HANDLING. Gitudloan ni 401st Brigade Philippine Army Spokesperson Capt. Jasper Gacayan ang mga sakop sa media kon unsaon ang saktong paghupot og armas.

PROSPERIDAD, Agusan del Sur – Gikomperma sa 401st Brigade Philippine Army, Philippine Army nga kadaghanan sa mga sakop sa New Peoples Army (NPA) mga sakop sa tribong Lumad.

Sumala ni Capt. Jasper Gacayan, tigpamaba sa 401st Brigade Philippine Army, gipahayag ni Commanding Officer Col. Alexander L. Macario atubangan sa 150 ka mga datu sa tribong Lumad nga tulo sa upat ka mga membro sa NPA – mga lumad.

Dali lamang matod pa mahaylo ang mga lumad nga magpasakop sa komunistang grupo tungod sa kakulang sa edukasyon.

Gitin-aw ni Col. Macario, kada tuig ang goberno mo gahin og trilyones pesos nga budget alang sa pagbatok sa insurhensiya sa nasod.

Pamugos ni Col. Macario, dako kaayo ang maong kantidad diin kon gamiton lamang matod pa kini sa edukasyon, kapin 300,000 ka mga magtutudlo ang ma-hire ug makapabarug sa liboan ka mga lawak tunghaan.

Subay niini, gi-awhag sa opisyal ang tanang lideres sa tribong lumad ning rehiyon nga motabang pagkombinsi sa mga lumad nga nisulod sa armadong pakigbisog nga mobalik na sa sabakan sa goberno alang sa kalamboan ug kalinaw sa komunidad.