Monday, August 17, 2015

P1M Multa Ipahamtang sa Meat Vendor

Ni Alex Mapoy
MULTA: Gipaneguro ni Dr. James Cabrera sa NMIS Caraga nga multahan hangtod P1,000,000 kadtong meat vendor nga malapason sa Administrative Order No. 6 (Hygienic Handling of Chilled, Frozen, and Thawed Meat in Meat Market). Photo by Alex Mapoy
BUTUAN CITY – Dako nga multa ang ipahamtang batok sa mga negosyante og karne kon magmagahi kini pagsunod sa patakaran kabahin sa pagbaligya sa mga inangkat nga karne nga gikan sa gawas sa nasod.

Sumala ni Dr. James Cabrera sa National Meat Inspection Service (NMIS) Caraga, multahan sa P100,000 hangtod P1,000,000 ang negosyante og karne kon magmagahi kini pagsunod sa patakaran kabahin sa insaktong pagbaligya sa mga imported meat.

Dugang ni Dr. Cabrera, gawas sa maong multa, prisohon og unom (6) ka bulan kadtong malapason.

Ilawom sa Administrative Order No. 6 o mas nailang Hygienic Handling of Chilled, Frozen, and Thawed Meat in Meat Market, hugot nga gimandoan ang tanang negosyante og karne kinsa namaligya og imported meat nga isulod kini sa freezer.

Dakong kalapasan sa maong kamandoan kon ang imported meat, ibaligya nga naka-display sa lamisa sanglit dali kini madaut sahi sa mga local meat nga dinhe lamang giihaw diin dili kini madaut bisan i-display pa og pipila ka oras.

Tambag sa opisyal, aron dili masugamak sa dakong multa ug mapriso ang meat vendor nga namaligya sa mga imported meat, angayan nga isulod ang maong klase sa karne sa freezer ug kon dunay mo palit, ayha pa kuhaon ang karne gikan sa freezer.

Isa hangtod duha lamang ka hugna nga hatagan og warning kadtong malapason ug kon magmagahi gihapon kini, ipahamtang ngadto sa responsableng meat vendor ang ngipon sa maong kamandoan.

Hisayran nga sa sayong bahin ning bulana, isa ka meat vendor sa lungsod sa San Francisco, Agusan del Sur ang gi-warningan sa buhatan human gilapas ang gikantar sa AO 6.

Bahad sa buhatan, kon magmagahi kini pagsunod sa maong simpleng patakaran, embargohon ang gibaligya niining karne kon masakpan nga gi-display gihapon kini sa lamisa sa sunod pagbalik sa grupo.

No comments:

Post a Comment