Tuesday, August 18, 2015

Chikungunya Outbreak, Ideklara sa Agusan del Sur?

Ni Alex Mapoy
“Let us be responsible inhabitants. Destroy all mosquito vector breeding sites, protect your skin from mosquito bites by wearing appropriate clothes,” awhag ni DOH Caraga RD Dr. Jose Llacuna
ESPERANZA, Agusan del Sur – Namiligro karon ang lungsod sa Esperanza Agusan del Sur nga ipailawom sa Department of Health (DOH) Caraga sa Chikungunya Outbreak human nagkataas ang ihap sa mga nataptan sa maong sakit.

Nasuta nga nilansang na sa 82 ka mga kaso ang natala sa maong lungsod diin kasagaran sa gipangbati sa pasyente ang labad sa ulo, pagpanakit sa lutahan, nagka-skin rashes, ug pagluya sa lawas.

Sa maong ihap, 15 niini ang nadala sa tambalanan aron madapatan sa saktong medikasyon.

Kasagaran sa mga pasyente ang na gikan sa tulo ka barangay sa maong lungsod partikular na sa Poblacion, Cubo, ug Dakutan.

Ang nahisgotang ihap maoy kasamtangang sumada sukad natala ang unang kaso adtong Mayo 21 ning tuiga partikular na sa Barangay Poblacion.

Sumala ni DOH Caraga Regional Director Dr. Jose Llacuna, human natala ang unang kaso, nagsunod sunod na dayon ang mga pasyente nga nagpakonsulta sa Rural Health Unit ug nagpa-admit sa Esperanza Medicare Community Hospital.

Dugang ni Dr. Llacuna, tanang pasyente ang pulos nakasinati og simtoma sa Chikungunya Viral Disease, apan ang laboratory confirmation, pabilin pang gihulat.

Gitin-aw sa direktor, ang nasinatian sa mga pasyente ang nitukma sa criteria sa World Health Organization (WHO) diin nabati ang maong mga simtoma 3 – 7 ka adlaw human napaakan ang pasyente sa lamok.

Paneguro usab sa opisyal nga tanang pasyente ang nahatagan og medikasyon aron mamaayo sa gihambing balatian.

Awhag sa direktor sa publiko, dili na hulaton pa ang pagkaylap sa Chikungunya virus kon angayan nga mo lihok kini pinaagi sa paguba sa mga lugar nga posibleng itlogan sa mga lamok nga maoy nagdala sa maong sakit.

Likayan usab nga dili mapaakan sa mga lamok aron mahilikay sa maong balatian.

Ang Chikungunya usa ka viral disease nga mo takod ngadto sa tawo pinaagi sa pinaakan sa lamok. Kadtong indibidwal nga mapaakan sa nasangpit nga lamok, ang makasinati og labad sa ulo ug pagpanakit sa lutahan. Laing simtoma mao ang pagpanakit sa kaunoran, pagpanglipong, lapoy ang lawas, ug skin rashes.

No comments:

Post a Comment