Thursday, August 20, 2015

7 Armadong Grupo, Hulga sa Seguridad

Ni Alex Mapoy
BUTUAN CITY – Giilang hulga sa seguridad sa mga Lumad ning rehiyon ang presensiya sa nagkadaiyang grupo nga paramilitar nga maoy hinungdan sa kalit nga pagpamakwit sa apektadong residente kinsa nanimuyo sa hilit nga mga dapit ning rehiyon.

Nahimong hulga sa komunidad sa mga lumad ang Bagani Force, Magahat, Salakawan, Wild Dog, Lubog, Alsa Masa, Bongkatol Liberation Front (BULIF).

Sumala ni Kahugpungan sa mga Lumadnong Organisasyon (KASALO) Caraga Spokesperson Josephine Pagalan, ang nahisgotang mga grupo maoy nihimo sa pagpanghasi, pagpanghadlok, pagpaniktik, ug naghimo’g kremin sa komunidad.

Gihulagway pa ni Pagalan ang maong mga grupo nga mga mangtas diin tungod matod pa sa ilang binuhatan, napugos ug suble-subleng namakwit ang mga lumad.

Sa saysay sa nahisgotan, Agosto 8 ning tuiga, 107 ka mga pamilya nga na gikan sa Nahikyad, Nalindog, Bishop, Bogbog ug Tandungan ngadto sa Brgy. Bolhoon, San Miguel, Surigao del Sur samtang kapin usab sa 67 ka mga pamilyang lumad Manobo ang nihikling gikan sa ilang pinuy-anan sa Dicoy, Panukmoan, Manluy-a ug Panagatan sakop sa Brgy.Diatagon, Lianga, Surigao del Sur ug Purok 5, 6 ug 7 sakop sa Brgy. Mabuhay, Prosperidad Agusan del Sur tungod sa pagpanghasi sa mga Bagani ug Magahat ni Datu Kalpet Igwa ug Marcos Bocales, Romeo Banusan.

“Ilalom sa kontra insurhensyang programang Oplan Bayanihan, mipakusog sa atake ngadto sa katawhang lumad pinaagi sa iyang “people centered approach” nga COPD nga puno sa pagpanghasi, kahadlok, pagpaniktik ug pagsabwag ug krimen sa mga komunidad sa lumad. Ang kamangtas sa armadong grupong paramilitar sama sa Bagani force, Magahat, Salakawan, WildDog, Lubog, Alsa Masa, Bongkatol Liberation Front kon BULIF ug uban pa sa pagpaluyo sa militar, padayong mibiktima sa katawhang lumad ug mibunga sa pinugos ug pabalik-balik nga pagpamakwet,pagdaut sa mga kabtangan ug pananom ug pagpatay,” tipik sa sulat ni Pagalan.

Ang maong kahimtang ingon man mga grupo, hugot nga gikondina sa Kasalo human natugaw ang malinawong pamuyo sa mga lumad.

No comments:

Post a Comment