STEP Program, Angayang Hangpon

Ni Alex Mapoy

BUTUAN CITY – Gitambagan ang publiko nga gustong mo avail sa Special Training for Employment Program (STEP) sa Technical Education and Skills Development Authority (TESDA) Caraga nga makig-alayon sa buhatan sa kongresista sa matag probensya.

Tumong niini nga malakip sa listahan sa maka-avail sa naasoy’ng programa diin ang slots nga gihanyag ang limitado lamang.

Sumala ni TESDA Caraga Specialist 1 Robert Roperos, ang mga kongresista maoy magkontrola sa naasoy’ng programa.

Kadtong benepisyaryo nga makahuman sa skills training ug makahupot og National Certificate (NC) ang hatagan kini sa libreng toolkits sa ingon magamit gilayon ang nakat-onang kahibalo.

Hisayran nga sa nakalabay’ng tuig, mokabat sa 1,772 ang ni-gradwar sa nagkadaiyang Vocational Course sa TESDA ning rehiyon diin 1,636 ang napailawom sa assessment, 1,322 ang nahimong sertipikado sa ahensya samtang 932 sa kinatibuk-ang ihap ang nakasulod og trabaho.

Nasuta nga sa nakalabay’ng tuig, dunay kinatibuk-ang slots ning rehiyon nga 2,178 apan wala na avail ang tanang slots human niabot lamang sa 1,882 ang na enroll.

Sa datos, 408 lamang ang na enroll sa Agusan del Norte, 459 sa Agusan del Sur, 481 sa Surigao del Norte, 430 sa Surigao del Sur, ug 25 sa Dinagat Island.

Subay niini, gidasig sa opisyal kadtong mga interesado nga mo dalikyat sa buhatan sa kongresista sa tagsa-tagsa ka probensya aron mapahimuslan ang maong nindot nga kahigayonan.