Monday, August 17, 2015

Immunization Gi-isnab sa Pipila ka Ginikanan

Ni Alex Mapoy
VACCINATION: Hulagway sa mga bata nga gibakunahan sa mga personahe sa Department of Health (DOH) Caraga. Photo courtesy of PIA Caraga
BUTUAN CITY – Pipila ka mga  ginikanan ning rehiyon ang ni-isnab sa gihimong pagpamakuna sa Department of Health (DOH) Caraga ngadto sa kabataang magtutungha partikular na ang mga nagtungha sa Grade 1 ug Grade VII.

Wala nisugot ang pipila ka mga ginikanan nga mabakunahan ang ilang anak human nitagam sa nakalabay’ng pagpamurga sa kabataan diin dunay pipila ka mga estudyante ang nadala sa tambalanan tungod sa reaksyon sa tambal.

Una nang gipamahayag ni DOH Caraga Regional Director Jose Llacuna, Jr. importante kaayo nga mahatagan ang mga estudyante sa “lifetime immunity” batok sa tetanus, mumps, rubella, ug diphtheria.

Paneguro ni Dr. Llacuna, ang mga bakuna nga iturok ngadto sa mga estudyante ang luwas nga gamiton, epektibo, ug gigamit kini sa tibuok kalibotan.

Daan nang gipaneguro sa direktor nga bugtong bakunahan mao lamang kadtong mga estudyante nga dunay parent consent samtang kadtong wala, ang dili pugson, ug dili usab angayan nga suspendihon sa klase.

Pipila sa mga reaksyon nga mahimong masinatian sa estudyante nga mabakunahan mao ang pagka-kuyapan, mo hubag ang gibakunahan nga parte sa lawas, hilantan, ug magka-skin rashes.

Mando usab sa opisyal, niadtong team nga magpahigayon sa pagpamakuna, gi-obliga nga dunay naka-standby nga ambulansiya aron madala gilayon sa ospital kadtong estudyante nga kinahanglang dalhon kon kini makasinati og reaksyon sa tambal nga giturok.

Ang gihatag nga bakuna ngadto sa kabataan mao ang Measles-Mumps-Rubella (MMR) ug Tetanus Diphtheria (Td).

Target sa buhatan nga mabakunahan ang 71,620 Grade 1 pupils ug 51,413 Grade VII students sa tibuok rehiyon.

Ang 2015 School-Based Adolescent Immunization dili lamang ipahigayon dinhe sa rehiyon sa Caraga kondi tibuok nasod kini nga kalihokan nga himuon sulod ning bulana nga gisabak sa tema, “Bakuna para sa kabataan, Proteksyon sa kinabukasan.”

No comments:

Post a Comment