Monday, August 17, 2015

Bulan sa mga Lumad, Gisaulog

Ni Alex Mapoy
BUTUAN CITY – Niduyog ang Kahugpungan sa mga Lumadnong Organisasyon (KASALO) Caraga sa pagsaulog sa Bulan sa mga Lumad.

Sumala ni Kasalo Caraga Secretary General Genasque B. Enriquez, angay saulogon sa katawhang lumad ang dakong kadaugan nga naabot bunga sa malahutayong pakigbisog sa katawhang lumad aron mabatokan ang madaugdaugong hut-ong.

Gi-awhag ni Enriquez ang katawhan nga ipadayon ang lumadnong kalihokan sa tibuok rehiyon Caraga aron mapanalipdan ang yutang kabilin, kaugalingong paghukom, ug lumadnong kultura.

Pamugos ni Enriquez, angayan lamang ipadayon ang pakigbisog aron dili molampos matod pa ang hakog nga tinguha sa gobernong Aquino ug higanteng korporasyon sa pagmina, proyektong pang-enerhiya, ug uban pang proyektong pangkalamboan.

Alang sa nahisgotan, ang maong tinguha sa kasamtangang goberno maoy nidaut matod pa sa yutang kabilin ingon man kinaiyahan.

Dili makitawhanon matod pa ang lakang gihimo sa goberno labi na dinhe sa rehiyon sa Caraga sanglit ang yutang kabilin ang napadulong lamang sa dagkong korporasyon sa mina.

Gamit matod pa ang Armadong Kusog sa nasod, nilampos ang kagamhanan nga ipagamit ang yutang kabilin.

Subay niini, nanghinaut ang nahisgotan nga ipadayon sa katawhang lumad ang nasugdan niining pakigbisog aron dili maangkon sa hingpit sa mga kapitalista ang gipanag-iyahang yuta.

No comments:

Post a Comment