Monday, January 11, 2016

Lumad Killers, P1.2M ang Ulo

Ni Alex Mapoy
Kahimanan gigamit sa lumad aron ikondina ang  kapakyas sa goberno pagdakop sa mga lumad killers.
SURIGAO DEL SUR – Gipatas-an na lamang sa kagamhanang Aquino ang ganti sa matag ulo sa September 1 Lumad Killing human hangtod karon, wala pa gihapoy nadakpan bisan usa sa tulo ka mga akusado.

Una nang gisaad nila 4th Infantry Division Commanding Officer MGen Oscar Lactao ug Police Regional Office (PRO) 13 Regional Director PCSupt. Vert Tinio Chavez nga adiser mahuman ang kasamtangang tuig, madakpan na sila Bobby Tejero, Margarito Layno, ug Loloy Tejero kinsa maoy akusado sa nahitabong September 1 Lumad Killing sa Kilometer 16 Sitio Han-ayan, Barangay Diatagon, lungsod sa Lianga sakop sa maong probensya.

Gipatas-an ang reward money gikan sa tag - P200,000 ang ulo sa tulo ka mga lumad killers ngadto sa tag - P1.2 milyon human gipermahan ni DILG Secretary Mel Senen Sarmiento.

Butyag ni 402nd Infantry Brigade Philippine Army (PA) Commanding Officer Col. Isidro Purisima nga aprubado na ang nasangpit nga ganti subay sa gipagawas nga NAPOLCOM Memorandum Circular No. 2015-136.

Nagtimaan kini nga niadtong makapresentar sa lawas nila Bobby, Margarito, ug Loloy, buhi man o patay, dunay madawat nga ganti nga tag – P1.2 milyon ang ulo.

Gihimong tag – P1.2 milyon ang patong sa ulo sa mga nahisgotan aron mapadali ang pagdakop ug pagpanubag sa salaud nga ilang nahimo.

Dumdoman nga adtong Septembre 1 sa ka adlawon, ngilngig nga gipatay sa mga nahisgotan sila Emerito Samarca, Dionel Campos, ug Bello Sinzo hinungdan nga napugos pagbakwit ang kapin 3,000 ka mga lumad ngadto sa Surigao del Sur Sports Center sa kahadlok nga sila ang isunod sa pag-ihaw.

Sa kabahinan sa mga lumad kinsa apektado sa kabangis sa armadong grupo sa maong probensya, gikondina ang awtoridad sa kalangan pagsikop sa mga akusado.

No comments:

Post a Comment