Sunday, January 10, 2016

Pambato sa PopCom Caraga, Hingpit Nang Napili

Ni Alex Mapoy
Regional Population Quiz and On-the-Spot Contests. Photo courtesy of PopCom Caraga

BUTUAN CITY – Nakapili na ang Population Commission (PopCom) Caraga og mga pambato alang sa pagahimuong National Population Contest nga ipahigayon sa dakbayan sa General Santos karong Pebrero 2016.

Ang upat nga mga pambato sa rehiyon mao sila John Alfred L. Lugo gikan sa Butuan City Division kinsa maoy nidaug sa Population Quiz; Hanna Jane B. Geotina gikan sa Surigao City Division kinsa maoy nidaug sa Essay Writing Contest; Jhaniel Galve gikan sa Surigao del Norte Division kinsa maoy nidaug sa Poster Making Contest; ug Micah F. Navales gikan sa Agusan del Sur Division kinsa maoy nidaug sa Jingle Writing & Singing.
Sumala ni PopCom Caraga Information Officer II Angie Balen – Antonio, ang naasoy’ng upat ka mga estudyante maoy ni-kampeon sa nakalabay’ng Regional Population Quiz and On-the-Spot Contests sa managlahing kategoriya.

Dugang ni Antonio, subay sa pagkampeon sa mga nahisgotan, sila ang magsilbing pambato sa rehiyon sa Caraga alang sa sunod tuig nga National Population Contest.

Matag kampeon sa nakalabay’ng kalihokan, pulos nakadawat og ganti ingon man certificate of recognition, medal, ug trophy.

Gipasabot ni POPCOM Regional Director Alexander A. Makinano, tinuig ang maong kalihokan nga gisalmotan sa tanang estudyante sa sekondarya kansang tuyo nga mapalapdan ang kahimatngon ug pag-engganyo sa mga batan-on nga manginlabot sa isyu sa populasyon sa ingon matabangan kini nga mahimong andam sa pag-atubang sa nagkadaiyang hagit sa kinabuhi nga naghulat kanila sa unahan.

Subay niini, nanghinaut ang opisyal nga sa umaabot nga national contest, manghawod ang mga pambato sa rehiyon.

No comments:

Post a Comment